Salmo 32 - Kalin Apo Dios

¹ Nagasat nan ipogaw ay napakawan, ay nan ipogaw ay kalingkingan Apo Dios nan basbasolna.

² Owen, nagasat nan ipogaw ay maid et basolna isnan pangiilaan Apo Dios. Siya ay maid ngawi isnan nemnemna.

³ Isdin egayak nang-ibabawiyan isnan basbasolko et maaanagaak gapo isnan basbasolko dakpay komapsot.

⁴ Kag-aw ya labi ay nangdosdosaka, apo, et kinmapsokapsotak ay kaneg nan maling-eling-etan isnan menpoos.

⁵ Daket ipodno nan basolko ken sik-a et adiyak et igagago nan ngawi ay inik-ikkak. Kinwanik en, “Ipodnok et nan basbasolko isnan apo.” Dakat pakawanen sak-en et tomalna dadlo nan nemnemko.

⁶ Isonga kanak en am-in ay nalinteg ay ipogawmo et menpakawanda koma ay dagos ken sik-a no makabasolda. Dat no waday mapasamakda ay kaneg isnan dakkel ay inewang et adida maiyanod.

⁷ Sik-a nan menkamkamangak et sik-a nan mangkawan ken sak-en isnan maligatak. Daet makidayaw ken sak-en nan iib-ak tay nang-isalakanka.

⁸ Kanan nan apo, “Iwanedko sik-a isnan osto ay daan ya bagbagaak sik-a dakpay kawkawanan sik-a.

⁹ Adim ik-ikkan nan kaneg nan ik-ikkan di kabayo ay adi makaawat tay masapol ay mapalongan nan topekna esapay omey isnan kaitolongana.”

¹⁰ Ado nan ligat di makedse ngem wawawawada nan adi menbalbaliw ay layad nan apo isnan mentaltalek ken siya.

¹¹ Gomasing kayo ay nalinteg, dakayopay menlagsak gapo isnan inikkan nan apo. Ibogawyo nan gasingyo, dakayo ay mangtongtongpal ken siya.