Salmo 31 - Kalin Apo Dios

¹ apo, sik-a nan menkamkamangak isonga adim koma ipalobos ay maibabainak. Mang-isalakanka kad isnan kinalintegmo.

² Dengngem kad nan dawatko ta mang-isalakanka ay dagos. Salidaam koma sak-en ay kanegka nan dakkel ay bato ay kamangko.

³ Owen, tay sik-a nan kaneg bato ay menkamkamangak et isolom kad ya iwanedmo sak-en ta madayawka isnan kinagawismo.

⁴ Wayaam kad sak-en isnan silo ay insaganada pala ken sak-en tay sik-a nan kamangko.

⁵ Italekko nan ab-abiikko ken sik-a tay mang-isalakanka, apo ay matalek ay Dios.

⁶ Kaiingek nan mendaydayaw isnan sinangdidios ngem sak-en pay, apo, et sik-a nan mentaltalkak.

⁷ Menlagsakak ya men-gasgasingak gapo isnan adi menbalbaliw ay layadmo tay mailam nan ligatko dakapay gegetken nan dadama ay menseseg-angak.

⁸ Egaymo inpalobos ay mang-abak nan mang-ap-apos ken sak-en nodi winayaam sak-en ta menteeak isnan gawis ay tean.

⁹ apo, seg-angam sak-en tay maliligatanak. Kinmapsot pay nan matak isnan men-agaagaak et maid et pigsak,

¹⁰ Makeskesayan pay nan matatagowak gapo isnan dadama ay seg-angko. Linmokelokeyak et gapo isnan ligatko dapay mangpos nan awakko.

¹¹ Am-in nan mang-ap-apos ken sak-en ya olay nan sag-ogongko ya gagayyemko et kanegda madogis ken sak-en. No mang-ilada pay et omaddawida ken sak-en.

¹² Nangkalingkingda am-in ay kanegak natey. Kanegak et nan nagpak ay banga ay naiwasit.

¹³ Dedengngek nan mangtaytayoktokan di mang-ap-apos ken sak-en et wada nan egyatko isnan am-in. Mentotolagda is ikkanda ken sak-en dadapay nemnemen ay mangpatey ken sak-en.

¹⁴ Ngem sak-en pay et sik-a, apo, nan taltalkek dakpay kanan en, “Sik-a nan Diosko.”

¹⁵ Wawawawadaak isnan pangay-ayowanmo. Isalakanmo koma sak-en isnan mang-ap-apos ya mangpalpaligat ken sak-en.

¹⁶ Seg-angam sak-en ay baam ta mang-isalakanka gapo isnan adi menbalbaliw ay layadmo.

¹⁷ Apo, adim koma ipalobos ay maibabainak isnan adim mangdengan isnan dawatko nodi nan makedse koma nan mabainan dadapay gominek et tay mateyda.

¹⁸ Paginkem koma daida ay men-et-etek ya menpapangato tay menkalkalida is baken tet-ewa isnan nalinteg ay ipogaw.

¹⁹ Dadama nan kinagawismo ay insaganam pala isnan mang-iyegyat ken sik-a ay nan gawis ay itedmo isnan menkamang ken sik-a ay iilaen di kaipoipogaw.

²⁰ Isnan kawad-am et lingbam daida isnan mangsogsogsog ken daida. Owen, isnan kad-am et sasalaknibam daida isnan mangtaytayoktok ken daida.

²¹ Madaydayaw nan apo, tay inpailana nan kaskasdaaw ay layadna ken sak-en isdin nangsokokanda ken sak-en.

²² Isnan egyatko et inpagalopko en naiyaddawiyak isnan pangiilaana Ngem idi nin-adawagak ken siya ta mangseg-ang danat dengngen nan dawatko.

²³ Dakayo ay matalek ay ipogawna, patgenyo nan apo tay kawkawanana nan matalek ngem nan men-et-etek et dosaena daida isnan maibagay ay dosada.

²⁴ Adiyo kak-aanen nan namnamayo isnan apo, dakayo am-in ay mangtaltalek ken siya.