Salmo 30 - Kalin Apo Dios

¹ Daydayawek sik-a, apo, tay nang-isalakanka ya egaymo inpalobos ay mang-ammeng nan mang-ap-apos ken sak-en.

² Nin-adawagak ken sik-a, apo ay Diosko, ta mangbadangka dakat pagawisen sak-en.

³ Egaymo inpalobos ay mateyak tay matmateyak dakat pagawisen sak-en et sinalbalmo sak-en isnan maikaobak koma.

⁴ Ikantayo nan pangdaydayawyo isnan apo, dakayo am-in ay matalek ay ipogawna. Nemnemenyo nan kinapateg nan apo ta men-iyaman kayo ken siya.

⁵ Tay nan ligetna et siawyan et kedeng ngem nan bindisyona et eng-enggana. Olay no men-agaka isnan labi ngem kawakgatana et wada et nan gasing.

⁶ Isdin kagawis nan kasasaadko et kinwanik isnan nemnemko en, “Maid polos madandanagak

⁷ tay sik-a, apo, et pinapigsam sak-en ay kaneg nan kakeneg nan bilig.” Ngem dakat obpay dokogan sak-en et inmegyaegyatak.

⁸ Nin-adawagak ken sik-a, apo, dakpay menseg-ang ay mangwani en,

⁹ “Maid magon-odmo ken sak-en no mateyak. Ngan di maalam ken sak-en no maikaobak? Tay adi makadayaw ken sik-a nan natey ya adida maipagtek nan maid patenggana ay kinagawismo.

¹⁰ Dengngem kad sak-en, apo, dakat mangseg-ang. Mangbadangka adi, apo.”

¹¹ apo, pinabalinmo nan seg-angko is lagsak. Kinaanmo nan menpapanesak et isokatmo nan gasing.

¹² Isonga adiyak et gomiginek nodi menkankantaak ay mangdaydayaw ken sik-a. Sik-a, apo, nan Diosko et men-iiyamanak ken sik-a ay eng-enggana.