Salmo 29 - Kalin Apo Dios

¹ Dakayo ay wada id daya, idayawyo nan apo, nan apo ay nadayaw ya manakabalin.

² Owen, idayawyo nan apo tay kalebbengana. Dayawenyo nan apo isnan mangipailaana isnan kinadiosna.

³ Madnge nan kalin nan apo isnan baybay. Owen, mentebag nan kido ay kalina nan dakkel ay baybay.

⁴ Nan kalina et makabael. Manakabalin gedan nan kalina.

⁵ Nan kalin nan apo et men-gopongna nan kak-aiw, ay olay nan makneg ay kak-aiw id Libano

⁶ ya nan bilig di Libano abes et men-iwedwedna ay kaneg nan lomagtowan di koyaw. Nan bilig ay Hermon et mentipataykona ay kaneg nan koyaw di baka.

⁷ Nan kalin nan apo et pawad-ena nan kimat

⁸ dat iwedwed nan kalina nan pondag. Owen, nin-iwedwedna nan pondag ay Kades.

⁹ Men-iwedwed nan kalina nan kak-aiw et mayakayak nan tobtoboda. Dat ibogaw nan am-in ay wada isnan templona en, “Madayaw si Apo Dios.”

¹⁰ Nan apo nan nintotolay isdin nan-engan di batawa et mentoltoloy nan mentolayana ay eng-enggana.

¹¹ Papigsaen nan apo nan ipogawna danapay idya nan talna ken daida.