Salmo 28 - Kalin Apo Dios

¹ apo ay menkamkamangak, badangam kad sak-en. Adim koma totowengen nan mendawdawatak. No adim dengngen sak-en et gawgawis pay di mateyak.

² Ingatok nan ledengko ay mang-ibatog isnan nadiosan ay kad-am ay mangdawat is badangmo. Dengngem koma sak-en, apo.

³ Adim itaptapi sak-en isnan mangdosaam isnan makedse ay mangik-ikkan is ngawi ay daida ay gawis nan kankananda isnan ib-ada dapay ngawi kadi nan panggepda.

⁴ Dosaem daida gapo isnan ik-ikkanda. Nan ngawi ay ik-ikkan di wasdin esa ken daida et siya koma nan kaneg nan ganabena.

⁵ Adida patgen nan inik-ikkam, apo, ya nan binoliwmo isonga dosaem koma daida is dosa ay maid patenggana.

⁶ Madaydayaw nan apo tay inidngena nan dawatko.

⁷ Nan apo nan pamigsak ya siya nan kanegko kalasag. Nintalekak ken siya danat badngan sak-en. Men-galalasingak isonga ikantak nan dayawko ken siya.

⁸ Nan apo nan pamigsan nan ipogawna ya siya nan menkamkamangan nan ali ay pinilina.

⁹ apo, isalakam nan ipogawmo dakapay bindisyonan daida ay kokwam. Sik-a ay mang-ipaspastol ken daida, ay-ayowanam daida ay eng-enggana.