Salmo 27 - Kalin Apo Dios

¹ Nan apo nan mangtangtanggew isnan nemnemko ya nan mang-isalsalakan isonga sino pay di apedko iyegyat? Nan apo nan menkamkamangak isonga adiyak polos omeg-egyat.

² No mangkedag nan makedse ta mangpateyda koma et maisogtoda dadapay maisokba.

³ Olay no mangliwes nan adoado ay mangbosboso ken sak-en et maid iyegyatko. Olay no mangsape nan mang-ap-apos ken sak-en et si Apo Dios kayet nan talkek.

⁴ Nan esa ay dawatek isnan apo ay kakakayatko ay dawaten ken siya et makiteeak koma isnan templona enggana ay matatagowak ta makigasingak isnan kinagawisna ya ta dawatek nan panangiwanwanedna.

⁵ Dat no domateng nan ligat et siya nan kad-ak isonga maid om-ommat ken sak-en tay malilinonganak isnan templona danapay ipaey sak-en isnan nangato ay batbato

⁶ tapno adi makakad-an nan mangbosboso mangkedkedag ken sak-en. Awnitak men-idaton isnan templon nan apo ay mang-ibibiyad isnan gasingko dakpay menkanta ya mendayaw ken siya.

⁷ Dengngem kad sak-en, apo, no mendawatak ken sik-a. Someg-angka ta tongpalem nan dawatko.

⁸ Inpanemnemmo ken sak-en en, “Omalika ta mangdaydayawka.” daket kanan, “Owen apo, omaliyak.”

⁹ Adim koma itabonan sak-en. Adika makaliget ken sak-en. Adim pakaanen sak-en ay baam. Sik-a din kabadangko et adika koma tomaytayan ya adim baybay-an sak-en, tay sik-a nan Dios ay mangisalsalakan.

¹⁰ Olay no baybay-an da ama ken ina sak-en ngem sik-a, apo, et kawanam kayet sak-en.

¹¹ apo, isolom nan laydem ay ikkak dakat iwaned sak-en isnan gawis ay daan tay mangseseed nan adoado ay mangbosboso ken sak-en.

¹² Adim ipalobos ay sapeen nan mangbosboso sak-en tay mangpadakdakesda ya mang-eg-egyatda.

¹³ Siya na nan patiyek, patiyek ay ilaek nan kinagawis nan apo isnan matatagowak.

¹⁴ Taltalkenyo koma nan apo dakayopay mamati ken siya. Adiyo kak-aanen nan namnamayo ken siya nodi nan apo nan talkenyo.