Salmo 26 - Kalin Apo Dios

¹ Apo, ipagtekmo ay nalintegak tay osto nan ik-ikkak ya sik-a et kedeng nan mentaltalkak.

² Somalyaem sak-en ay gawis dakat padasen sak-en, apo. Paneknekam nan panggepko ya nan nemnemko.

³ Nan layadmo ay maid patenggana nan menbasbasalak ya nan kinamatalekmo nan mang-ipangpango ken sak-en.

⁴ Adiyak makikadkadwa isnan manag-allilaw ya nan agin-agin ay ipogaw.

⁵ Kaiingek nan mangik-ikkan is ngawi ya ilislisyak nan makedse.

⁶ apo, owasak nan ledengko ta mangipaila ay nalintegak daket makiliwes isnan altarmo

⁷ ay mang-ikanta isnan mendayawak ya men-iyamanak ken sik-a dakpay ibaga ay mangipanemnem isnan nakaskasdaaw ay inik-ikkam.

⁸ Patgek nan baeymo, apo ay kad-an gedan nan dayawmo.

⁹ Adika omitapi isnan mangdosaam isnan managbasol ya isnan dosan gedan di menpatpatey

¹⁰ ya nan ngawi nan panggepda ya menpaspasoksok

¹¹ tay bakenak kaneg daida nodi nalintegak isonga mangseg-angka ta mang-isalakanka, apo.

¹² Gegetkek ay masasalaknibanak isnan am-in ay kaeegyat. Daydayawek nan apo isnan madagdagopan nan ipogaw.