Salmo 22 - Kalin Apo Dios

¹ Apo Dios ay Diosko, dakan taynan sak-en? Ninsegseg-angak ta mangbadangka ngem kanegka omaaddawi ken sak-en dakapay adi kayet dengngen nan adawagko.

² 0 Diosko, isnan kag-aw et mendawdawatak ngem maid songbatmo. Mendawdawatak gedan isnan labi dakpay adi kayet makakin-e.

³ Ngem sik-a, apo, nan maid polos kangawina ay mentoltolay ya daydayawen nan Israelita.

⁴ Sik-a nan taltalken din alai-apomi tay tinalekda sik-a et insalakanmo daida.

⁵ Nin-adawagda ken sik-a dakat isalakan daida ya tinalekda sik-a et egaymo binaybay-an daida.

⁶ Ngem sak-en pay et kanegak keang tay kanegak baken ipogaw tay selaselaten ya iyaiyawen nan kaipoipogaw sak-en.

⁷ Am-in ay mang-ila ken sak-en et mangselatda dadapay mang-ikonad ya iwegwegda nan oloda.

⁸ Kankananda en, “Talkena nan apo kano isonga siya koma adi nan mang-isalakan ken siya. No laylayden met laeng nan apo siya et isalakana koma siya.”

⁹ Ngem sik-a, apo, nan nang-ipabala ken sak-en ya olay din kaengngak ay mensososowak pay laeng ken ina et nang-ayowanka ta maid om-ommat ken sak-en.

¹⁰ Enggana isdin binmalaak et sik-a nan nintaltalkak ya sik-a nan Diosko menlogi isdin naboliwak.

¹¹ Isonga adim koma taytaynan sak-en tay omal-ali et nan ligat dapay maid bomadang.

¹² Mangliliwes nan kabosobosok ay kanegda nan makedse ay baka. Liliwesenda sak-en ay kanegda nan baka id Basan ay napigsa dapay mensakgod.

¹³ Tatakawenda nan topekda ay kan-egda naanganga ay layon ay mangdoklos ya mangpislapislak ken sak-en.

¹⁴ Linmokeyak et nammid nan pigsak ay kaneg nan danom ay naiwasit. Kaneg et pay maid toltolangko ya pilmi nan kebkeb nan baak.

¹⁵ Naango pay nan ayokookko ay kaneg nan naangoango ay lota ya naipket et nan dilak isnan tangenko. Tinaynam sak-en isnan lota ay matmatey.

¹⁶ Mangliliwes nan bonggoy di makedse ay kan-egda atap ay aso. Linokawanda pay nan ledengko ya sikik.

¹⁷ Maiila et nan toltolangko isonga mang-ikiyatda dadapay men-gasing isnan ommat ken sak-en.

¹⁸ Pinigpigasda nan badbadok. Ninsosogalanda nan an-ando ay badok.

¹⁹ Ngem sik-a, apo, et adika koma omaaddawi ken sak-en. Sik-a ay pamigsak, ikamom kad ay omali ta mangbadangka.

²⁰ Mang-isalakanka isnan mangbetbet ay mangpatey ken sak-en. Isalakanmo kad nan biyagko isnan kabaelan nan naayday aso.

²¹ Mangsalaknibka isnan topek nan naayday layon. ya isnan sakgod nan naayday atap ay baka.

²² Ibagbagak nan maipanggep ken sik-a isnan bebebsat. Daydayawek sik-a isnan madagdagopanda.

²³ Dakayo ay mang-iyegyat isnan apo, daydayawenyo siya. Dakayo ay an-ak din si Jacob, ipangatoyo siya. Owen, am-in kayo ay Israelita et patgenyo siya

²⁴ tay adina baybay-an nan kodokdo nodi badangana daida isnan mapalpaligatanda. Adina dokdokogan daida nodi inaagna daida isnan men-adawaganda.

²⁵ Isnan madagopan di ipogawmo et daydayawek sik-a, apo, Daket ibon-ong nan inkalik ay igasingko isnan kad-an nan mangpateg ken sik-a.

²⁶ Dat makikan nan kodo et engganay mapnekda ya nan mang-an-anap isnan apo et das-anda siya dadat dayawen. Sapay koma ta mennam-ayda ay eng-enggana.

²⁷ Am-in nan kaipoipogaw et nemnemenda nan apo dadapay somagong ken siya ta dayawenda siya.

²⁸ Tay nan apo et Ali isonga itolayana nan am-in ay kailiili.

²⁹ Am-in ay menpapangato ya nababa et menlokbobda ken siya. Owen, am-in ay ipogaw ay olay nan matmateyan et menlokbobda gedan.

³⁰ Nan an-akda is kasin enggana is komasin et patpatiyenda siya tay awnit ipagtek nan ipogaw ken daida nan maipanggep isnan apo.

³¹ Awnit maibaga isnan egay pay laeng naiyanak id wani ay nan apo et insalakana nan kaipoipogawna.