Salmo 21 - Kalin Apo Dios

¹ Men-gasgasing nan ali tay pinapigsam siya, apo. Pilmi nan gasingna tay pinangabakmo.

² Inidyam nan kakakayatna ya inidngem nan lowalona.

³ Insab-atmo nan bindisyon ken siya dakat kolonaan siya is balitok.

⁴ Dinawatna nan ando ay biyag et inidyam. Owen, nan an-ando ay biyag ay maid patenggana.

⁵ Isnan nangpangpangabakam ken siya et pilmi nan dayawna ya inidyam nan kinapateg ya kinangato ken siya.

⁶ Kanayon ay binbindisyonam siya ya nan kawad-am nan pilmi ay men-gasgasingana.

⁷ Mentaltalek nan ali ken sik-a, apo. Kanayon ay masasalakniban gapo isnan adi menbalbaliw ay layad nan kangatowan.

⁸ Depapem nan am-in ay mang-ap-apos ken sik-a. Am-in ay mangliliget ken sik-a et depapem:

⁹ Isnan menpailaam et awnitmo dadaelen daida. Kaneg nan ikkan di menbidbidang ay apoy nan ikkam. Gapo isnan ligetmo, apo, et dosaem daida dat ngoposen di apoy daida.

¹⁰ Olay gedan nan aan-ak ya aap-oda et pammidem ta maid olay esa ken daida is mabay-an isnan batawa.

¹¹ Mentotyada is ngawi ay ikkanda ken sik-a ngem adi matongpal nan panggepda

¹² tay panaam daida ta mensanodda dadat lomayaw.

¹³ Ipangatomi sik-a, apo, isnan pigsam. Ikantami nan pangdaydayawmi isnan kabaelam.