Salmo 20 - Kalin Apo Dios

¹ Sapay koma ta dengngen nan apo sik-a isnan menligatam. Owen, salakniban koma nan Dios din si Jacob sik-a.

² Isnan kad-ana isnan pagdayawan ken siya id Sion et badngana ya papigsaena koma sik-a.

³ Adina kalkalingkingan koma nan am-in ay indatdatonmo nodi magasingan koma isnan mapoowan ay in-gasgasingmo.

⁴ Idyana koma nan kaykayatmo ya ipatongpalna am-in nan panggepmo.

⁵ Dat isnan mangabakam et ibogawmi nan men-gasinganmi dakamipay daydayawen nan Dios tako. Sapay koma ta am-in ay dawatmo et tongpalen nan apo.

⁶ Getkek et id wani ay pangabaken nan apo nan pinilina tay idngena siya isnan napateg ay kad-ana id daya danat pangabaken siya isnan panakabalina.

⁷ Wadada nan mentalek isnan loganda ay pala gobat ya nan tapina et nan kabayoda nan talkenda ngem datako et nan talken tako et nan panakabalin nan apo ay Dios tako.

⁸ Daida et maisogtoda dadat maekdag ngem datako pay et makneg tako isonga adi tako katoktokang.

⁹ apo, pangabakem kad nan ali dakapay dengngen dakami no mendawat kami.