Salmo 2 - Kalin Apo Dios

¹ Apay nga aped bosbosowen nan kailiili si Apo Dios? Apay nga apedda mennemnem is ol-olay ay mang-apos ken Apo Dios?

² Madagop nan alin di kailiili ya nan menkangangato ay ipogaw ta tolagenda ay manggobat isnan apo ya nan pinilina

³ dadat kanan en, “Kaanen tako et nan kalinteganda ken datako tay adyan tako nan mangitoltolayanda ken datako.”

⁴ Id daya et men-ammeng nan apo ay tolay et ammengana daida isnan panggepda ay maid silbina.

⁵ Dat isnan ligetna et sagiitena daida. Owen, isnan pilmi ay ligetna et paegyatena daida isnan mangwaniyana en,

⁶ “Dinotokak et nan ostoy ali id Sion ay napateg ay biligko.”

⁷ Dat kanan san ali en, “Ta ipagtekko nan inbagan nan apo tay kinwanina en, ‘Sik-a nan anakko. Id wani et sak-en et nan amam.

⁸ Mendawatka ta ipatawidko am-in ay kailiili ken sik-a. Awnitmo tawiden nan am-in ay wada isnan batawa.

⁹ Sik-a nan apoda isonga bomikaska ay mangitolay ken daida. Dosaem nan ngawi ay kaneg kamekmekan is banga.’ ”

¹⁰ Isonga id wani somilib kayo ay aali ta dengngenyo nan naay makwani. Idngeyo nan naay maibaga ken dakayo ay mentolay isnan batawa

¹¹ Patgenyo nan apo ta silbiyanyo ya iyegyatyo siya.

¹² Menpakombaba kayo ken siya ta adiyet makaliget et matey kayo. Nagasat nan am-in ay menkamang isnan apo.