Salmo 19 - Kalin Apo Dios

¹ Ipagtek nan daya nan kaidaydayawan Apo Dios tay ipailana nan binoliwna.

² Kaageagew ya kalabilabi ay ipagtekna.

³ Adida makakali wenno makaagasaas

⁴ ngem olay no keg todi et nadnge isnan natkenatken ay ili ya maipagtek isnan am-in isnan batawa. Id days sinapon Apo Dios nan tean di agew.

⁵ Winakgat ay bomala nan agew ay kaneg na nan kaas-asawa ay pilmi nan gasingna ya kanegna gedan nan manglaylayad ay makilomba.

⁶ Magagapo isnan esay solin di daya et menliwes engganay omdan isnan bangilna dat liknaen nan am-in nan poosna.

⁷ Gawigawis nan linteg nan apo tay papigsaena nan nemnem. Matalek nan bilbilin nan apo tay nan kolang nan getkenda et pasilibena.

⁸ Nan linteg nan apo et ostoosto ya nan mangtongpal et malagsakanda. Nalinteg nan bilbilin nan apo tay matanggewan nan nemnem.

⁹ Nan panangpateg isnan apo et gawis dapay adi menbalbaliw ay eng-enggana. Nalinteg nan ikkan nan apo ay men-okom tay maid paam-amdena.

¹⁰ Am-amed nan kinapategda mo nan kagawisan ay balitok. Mammam-is nan linteg Apo Dios mo nan kaimisan ay dilo.

¹¹ Palaingenda sak-en ay baan Apo Dios. Dakkel nan ipaayna ken sak-en isnan mangtongtongpalak.

¹² Ayke od waday mamangtek is kamalina? apo, pakawanem sak-en isnan adiyak getken ay kamalik.

¹³ Ikasiwmo sak-en ay men-ikkan is ngawi ay gegetkek ay basol. Adim ipalobos ay mangbaa nan ngawi tasiyay di maid kadelawak ya ta adiyak menbasol is nadagsen.

¹⁴ apo, sik-a nan mangsobot ken sak-en ya kamangko. Sapay koma ta kagagasingmo nan kankanak ya nan nemnemnemek.