Salmo 18 - Kalin Apo Dios

¹ apo, laylaydek sik-a ay pamigsak.

² Nan apo nan kaneg bato ay menkamkamangak ya siya gedan nan salaknibko. Owen, nan Diosko nan bato ay menkamkamangak tay isnan kawadana et maid om-ommat ken sak-en ya siya nan mangsasalida ken sak-en.

³ Men-adawagak isnan apo ay lebbengna ay madayaw et maisalakanak isnan mang-ap-apos ken sak-en.

⁴ Nabedbedak isnan galot di tetey et ngannganiyak ay maiyanod.

⁵ Nasepedanak isnan tetey isonga gistayak maipantiong.

⁶ Isnan naay ligatko et nin-adawagak isnan apo ta mangbadang siya ay Diosko. Et isnan templona et dinngena nan kalik tay inidngena nan nin-ad-adawagak.

⁷ Dat isnan liget Apo Dios et ninyegyeg nan batawa. Olay nan pegnad di bilbilig et nawedwedda.

⁸ Nin-asok nan eengna ya binmala nan menbidbidang ay apoy ya gabbang isnan topekna.

⁹ Danat pewaken nan daya ta gomwab siya ay gagatinana nan menngitit ay liboo.

¹⁰ Dat mensakay isnan matmatago ay napapayakan ay makwani en kerubim dadat makitayaw isnan dagem.

¹¹ Inbalabalna nan bolinget ya mensede ay liboon di odan nan mangliliwes ken siya.

¹² Magapgapo isnan pat-an di kad-ana nan kimat ya dalalo.

¹³ Daet menkali nan apo et menkido et nan kalin nan kangatowan et mentebagna nan daya.

¹⁴ Ninpanaana nan bosbosona et maiwakatda. Kimat nan inpanana ken daida.

¹⁵ Isdin nangpaegyatam isnan mangbosboso ken sik-a, apo, ay nangbogawam ken daida is ligetmo et nalokyasan nan daem di baybay ya nan pegnad nan batawa et maiilada.

¹⁶ Daet kaneg manggaw-at nan apo ay wada id ngato et mang-ipadaka isnan adaem ay danom.

¹⁷ Insalakana sak-en isnan pigsan di kagobatko ya isnan am-in ay mangliliget ken sak-en tay pilmi ay napigsada mo sak-en.

¹⁸ Nangkalitda isdin maliligatak ngem nan apo nan kabadangak.

¹⁹ Isnan maliligatak et binadbadangana sak-en. Nang-isalakan tay kagagasingna sak-en.

²⁰ Nangligalo nan apo tay osto nan ik-ikkak. Nangbindisyon tay nalintegak.

²¹ Tinongtongpalko nan bilin nan apo ya egayko dinokdokogan nan Diosko.

²² Sinolsolotko nan am-in ay lintegna ya egayko dinokdokogan nan am-in ay bilbilina.

²³ Owen, getkena ay maid kadelawak ya getkena ay egayak nin-ik-ikkan is ngawi.

²⁴ Isonga mangligalo tay osto nan ik-ikkak ya nalintegak isnan pangiilaana.

²⁵ apo, matalekka isnan mangtalek ken sik-a ya maid ik-ikkam is kadelawam isnan maid kadelawanda.

²⁶ Maid ngawi is ipap-ailam isnan adi mang-ik-ikkan is ngawi ngem nasikapka isnan baken nalinteg.

²⁷ Isalakanmo nan nababa ngem nan menpapangato et pababaem.

²⁸ Sik-a, apo, nan silawko et sik-a, Diosko, nan mangpapat-a isnan kinabolingetko.

²⁹ No badangam sak-en et napigsaak ay mang-abak isnan ado ay mangbosboso dakpay kabaelan ay mangkaab isnan seyatda.

³⁰ Si Apo Dios et maid kadelawan nan ik-ikkana tay tet-ewa ay matalek nan kalina. Siya nan kaneg kalasag nan am-in ay komamang ken siya.

³¹ Maid teken is Dios nodi nan apo et kedeng et kedkedeng si Apo Dios is pegnad di ipogaw.

³² Si Apo Dios gedan nan mangpapapigsa ken sak-en ya paknegena nan daanko.

³³ Agtana sak-en is laing ay makatagtag ay kaneg nan ogsa ya mang-ay-ayowan isnan bilbilig ta maid om-ommat ken sak-en.

³⁴ Isolowana sak-en ta pomigsaak ay makigobat ta olay nan kakenegan ay pana et magoyodko.

³⁵ apo, sik-a nan salaknibko tay maid om-ommat ken sak-en gapo isnan panakabalinmo ya naipangatowak isnan badangmo.

³⁶ Insetmo pay nan daanko ta adiyak maisagsagaw.

³⁷ Kedagek nan mangboso ken sak-en ta depapek daida. Adiyak somaldeng engganay maaminda.

³⁸ Pinat-owak daida et adida makabangon et engganay masokpot nan angesda.

³⁹ Papigsaem pay sak-en ay makigobat ya pangabakem sak-en isnan kagobatko.

⁴⁰ Pinaegyatmo nan kagobatko ta tomagtagda dakpay aminen daida.

⁴¹ Menpabadangda ngem maid mangbadang ken daida. Mendawatda ken sik-a, apo, ngem adim idnge daida.

⁴² Mekmekek daida ta komanegda tapok et itayaw di dagem daket gatigatinan daida ay kaneg nan pitak isnan daan.

⁴³ Insalakanmo sak-en isnan mangbosboso ken sak-en dakapay patolayen sak-en isnan kaipoipogaw. Et olay nan adiyak getgetken ay ipogaw et mentolayak ken daida.

⁴⁴ No dengngenda nan kanak et tongpalenda sak-en dadapay menpababa ken sak-en.

⁴⁵ Gegetkenda ay maaabakda dadat bomala ay omeegyat isnan sinapoda ay mentabtabonanda.

⁴⁶ Nan apo et matatatago. Madaydayaw siya ay menkamkamangak. Ipapangatok si Apo Dios ay mang-isalsalakan ken sak-en.

⁴⁷ Siya nan Dios ay mangipangabak ken sak-en isnan kagobatko danapay ipababa nan kaipoipogaw tapno itolayak daida.

⁴⁸ Siya nan mangisalsalakan ken sak-en isnan kagobatko. apo, sik-a nan mangipangabak ken sak-en isnan mang-ap-apos ken sak-en dakapay salakniban sak-en isnan makedse

⁴⁹ isonga daydayawek sik-a isnan am-in ay kaipoipogaw. Owen, ikankantak nan pangdaydayawko ken sik-a.

⁵⁰ Pangabaabaken Apo Dios nan alina ya ipailana nan layadna ay maid patenggana isnan pinilina ay si David ya nan aap-ona ay eng-enggana.