Salmo 17 - Kalin Apo Dios

¹ apo, dengngem kad nan adawagko ta nan lebbengna nan maikkan ken sak-en. Dengngem koma nan bogawko ay menpabadang. Dengngem nan lowalok tay adiyak menkamkampot.

² Sapay koma ta ipagtekmo nan kinalintegko tay getkem nan osto.

³ Gegetkem met nan wada isnan nemnemko tay olay no mangpadaska isnan labi ya olay no somalyaem sak-en et maid madas-am is ngawi ken sak-en. Adiyak menkalkali is ngawi

⁴ kaneg nan ik-ikkan nan tap-ina. Tinongpalko nan bilbilinmo ay egayko sinolsolot nan ik-ikkan di makedse.

⁵ Sinolsolotko nan daanmo et egayak polos naisis-iyan.

⁶ Menlowalowak ken sik-a, Apo Dios, tay inaagmo sak-en. Owen, dengngem kad nan lowalok.

⁷ Ipailam nan kaskasdaaw ay layadmo tay sik-a nan mangisalakan isnan menkamang ken sik-a gapo isnan mangbosboso ken daida.

⁸ Mangkawanka ay kaneg nan maayowanan di mata. Sakokowam sak-en

⁹ ta adi mang-ila nan mang-ap-apos ay mangpalpaligat ken sak-en. Owen, daida ay mangliliwes ken sak-en.

¹⁰ Maid polos seg-angda dadapay lalastogen isnan panagkalkalida.

¹¹ Nangsokokda et mangliliwesda. Naay mang-ambonda ta itep-ada sak-en.

¹² Kanegda layon ay mangseseed ta mangdepapda. Owen, kanegda nan layon ay nakasagana ay mang-isda.

¹³ apo, omalika ta abakem nan mangbosboso. Isnan ispadam et isalakanmo sak-en isnan makedse.

¹⁴ Isalakanmo sak-en ken daida ay nan wada isnan batawa nan mamapnekanda. Dosaem daida isnan ligat ay insaganam pala ken daida. Sapay koma ta omanay nan dosa isnan an-akda ya wada pay koma di mabay-an is dosa pala isnan ap-oda.

¹⁵ Ngem sak-en et awnitko ilaen sik-a tay nalintegak dakpay men-gasgasing tay wadaka ken sak-en.