Salmo 16 - Kalin Apo Dios

¹ Apo Dios, salaknibam kad sak-en tay sik-a nan menkamkamangak.

² Kinwanik isnan apo en, “Sik-a nan Apowek. Am-in nan gawis ken sak-en et sik-a nan nagapowana.”

³ Gawigawis nan matalek ay ipogaw Apo Dios et kagagasingko ay makikadkadwa ken daida.

⁴ Nan menkamkamang isnan sinangdidios et amedda paad-adowen nan ligatda. Adiyak makiik-ikkan isnan men-idatdatonanda ya adiyak makidaydayaw isnan sinangdidiosda.

⁵ apo, sik-a nan magapgapowan nan am-in ay masapolko isonga ipakekenegmo nan biyagko.

⁶ Gawigawis nan inpatawidmo ken sak-en tay mappay nan daga ay sakopna.

⁷ Daydayawek nan apo isnan mangbadbadangana ken sak-en. ya olay isnan labi et ipanemnemna nan osto ay ikkak.

⁸ Getkek ay mangtatakdoka, Apo Dios et olay no waday domateng is ligat et adiyak omegyat tay wadaka ay bomadang.

⁹ Isonga men-galalasingak et maila nan gasingko isnan kankanak ya wada pay nan namnamak

¹⁰ tay getkek ay adika mangkalkalingking isnan kad-an di natey ya adim ipalobos ay madonot nan awak di napateg ay pinilim.

¹¹ Inpagtekmo nan ikkak ta matatagowak ay eng-enggana et palalo nan gasingko tay makiteteeak ken sik-a. Owen, gasing ay maid patenggana isnan kad-am.