Salmo 148 - Kalin Apo Dios

¹ Madaydayaw nan apo. Dakayo ay mentetee id daya, dayawenyo siya.

² Dayawenyo siya dakayo am-in ay aanghelna. Dayawenyo gedan dakayo ay babaana ay wada id daya.

³ Dayawenyo ay agew ya bowan. Dayawenyo gedan ay menkimkimat ay talaw.

⁴ Dayawenyo siya dakayo ay daya ya danom isnan ngaton di daya.

⁵ Dayawen koma nan am-in nan apo tay isnan bilina et naboliwda.

⁶ Isnan bilina gedan et naippeyda isnan lebbengna ay menteanda ya tongpalenda nan bilina ay menteteeda isnan kad-anda ay eng-enggana.

⁷ Dayawenyo nan apo dakayo isnan batawa ya nan dadakke ay mentetee isnan baybay ya isnan kaadaeman di danom.

⁸ Dayawen gedan nan mangtongpal isnan bilina ay nan kimat, dalalo, liboo ya napigsa ay dagem siya.

⁹ Dayawen gedan nan bilbilig, kak-aiw ya nan pagpag siya

¹⁰ ya dayawenyo gedan ay animal ay amo ya atap, koykoyat ya nan menkodkodong isnan batawa.

¹¹ Dayawenyo siya dakayo ay mentotolay, nan itoltolayanyo ya nan menlelebbeng Owen, dayawenyo siya dakayo am-in ay ipogaw,

¹² ay bababassang ya bababallo, naeteng ya nan oongong-a gedan.

¹³ Dayawen koma nan am-in nan apo tay napatpateg siya mo nan am-in. Nan dayawna et nangatngato mo nan batawa ya nan daya.

¹⁴ Pinapigsana nan ipogawna et daydayawenda am-in siya ay daida ay Israelita ay ipogawna ay kalalayadna. Madaydayaw nan apo.