Salmo 147 - Kalin Apo Dios

¹ Madaydayaw nan apo. Kagagasing ay mang-ikanta is pangdaydayaw ken Apo Dios ay apo tako. Owen, kagagasing ya lebbengna ay madayaw siya.

² Kasin panam-ayen nan apo nan ili ay Jerusalem ya isagongna isnan ilida nan naipakaan ay Israelita.

³ Pagasingena nan namaid namnamada danapay badangan nan madadagsenan.

⁴ Ninemnemna nan bilang di talaw danapay ngadnan daida ay sag-es-a.

⁵ Napateg ya manakabalin nan apo tako ya adi kabilang nan silibna.

⁶ Ipangatona nan nababa danapay dosaen nan makedse.

⁷ Ikantayo nan men-iyamananyo isnan apo dakayopay menkotengteng ken siya.

⁸ Ipaeyna nan liboo isnan daya ya menpaodan isnan batawa danapay patobowen gedan nan loglogam isnan bilbilig.

⁹ Agtana nan talaken is kanenda danapay pakanen nan an-ak di owak no menkiyakda.

¹⁰ Baken nan napigsa ya napaspas ay kabayo is kagagasingna wenno is natoled ay sosoldado

¹¹ nodi nan kagagasingna et nan mangpateg ken siya ya nan mangtalek isnan adi menbalbaliw ay layadna.

¹² Dakayo id Jerusalem, dayawenyo nan apo. Owen, dayawenyo si Apo Dios.

¹³ Paknegena kasin nan iliyo ya bindisyonana dakayo ay ipogawna.

¹⁴ Olnosena dakayo ta gawis nan iliyo danapay peneken dakayo isnan kagawisan ay makan.

¹⁵ Ninbilin isnan batawa et dagos ay maikkan nan kanana.

¹⁶ Owen, no kanana en pinagtedek dat tet-ewa tomedek.

¹⁷ Men-ipaey pay is dalalo ay amed mangpatedek et maid makaitpe isnan tedekna.

¹⁸ Danat bilinen et malonag nan kinmenteg ay danom danapay ipaey nan dagem ta men-ayos kasin.

¹⁹ Ipagtekna nan kalina isnan ipogawna, ay nan isolsolona ya lintegna ken daida ay Israelita.

²⁰ Egayna inik-ikkan na isnan tap-in di il-ili et adida getken nan lintegna. Madaydayaw nan apo.