Salmo 146 - Kalin Apo Dios

¹ Madaydayaw nan apo. Owen, daydayawek siya.

² Daydayawek siya isnan matatagowak. Isnan matatagowak et idayday-engko nan pangdaydayawko ken Apo Dios ay apo.

³ Adim taltalken nan ipogaw ay olay no nangato nan saadna tay adi maisalakan di ipogaw sik-a

⁴ tay no mateyda et somagongda isnan lota ay nagapowanda et isnan deey ay agew et makwas nan gandatda.

⁵ Nagasat nan ipogaw ay nan Dios din si Jacob nan kabadangna ya nan namnamana et nan apo ay Diosna

⁶ ay nangsapo isnan daya, batawa, nan baybay ya nan am-in ay wada is dana ya kanayon ay mangtongpal isnan am-in ay inkalina.

⁷ Badangana nan maaamis danapay agtan is makan nan maoowat. Wayaan nan apo nan naibalod is maid gapona

⁸ danapay agasan nan kowap ta makaila ya ipangatona nan maipabababa. Laylaydena pay nan nalinteg.

⁹ Salaknibana nan sasangaili ay mentetee isnan daga tako ya badangana nan balo ya ngoso ngem dosaena nan makedse.

¹⁰ Nan apo et ali ay eng-enggana. Owen, mentolay ay eng-enggana si Apo Dios ken dakayo ay iSion. Madaydayaw nan apo.