Salmo 145 - Kalin Apo Dios

¹ Ipagtekko nan kinangatom ay Diosko ay ali dakpay mendaydayaw ken sik-a ay eng-enggana.

² Winakgat ay men-iyamanak ken sik-a ya daydayawek sik-a ay eng-enggana.

³ Napateg nan apo et lebbengna ay maidaydayaw ya adi pay kalokod nan kinangatona.

⁴ Nan ik-ikkam et madaydayaw isnan am-in ay ipogaw ay enggana is komasin. Owen, awnitda ipagtek nan kaskasdaaw ay ik-ikkam.

⁵ Ibagbagada gedan nan dayawmo ya nan kinapategmo dakpay ipapasnek ay mangnemnemnem isnan kaskasdaaw ay ik-ikkam.

⁶ Owen, ibagbagan nan kaipoipogaw nan kaskasdaaw ay ik-ikkam dakpay abes ibagbaga nan kinangatom.

⁷ Ibagbagada nan dadama ay kinagawismo dadapay ikanta nan nalinteg ay ik-ikkam.

⁸ Managlayad ya managseg-ang nan apo dapay baken nalaka ay makaliget ya nan layadna et maid patenggana.

⁹ Gawis siya isnan am-in ya seg-angana nan am-in ay binoliwna.

¹⁰ apo, dayawen am-in nan ipogawmo sik-a. Owen, am-in nan binoliwmo et dayawenda sik-a.

¹¹ Awnitda ibagbaga nan dayawmo isnan mentolayam ya nan kabaelam

¹² tapno getken nan am-in nan kaskasdaaw ay ik-ikkam ya nan nangato ay dayawmo isnan mentotolayam.

¹³ Nan mentolayam et eng-enggana ya maid patenggan nan mentotolayam. Matalek nan apo isnan inkalkalina ya am-in ay ik-ikkana et gawis.

¹⁴ Badangana nan nakapsot nan nemnemda ya papigsaena nan epdas kinmapsot ta adi mammid nan namnamada.

¹⁵ Am-in ay matmatago et sik-a nan namnamada ya agtam daida is kanenda isnan mangsapolanda.

¹⁶ Nan idyam ken daida et omanay ya penekem daida am-in isnan masapolda.

¹⁷ Nalinteg nan apo isnan am-in ay ikkana ya managseg-ang gedan siya.

¹⁸ Asag-en siya isnan mendawat ay nan adi mendowadowa ay mendawat ken siya.

¹⁹ Idyana nan masapol nan mangdayaw ken siya ya dengngena pay nan agada danat isalakan daida.

²⁰ Salaknibana am-in ay manglaylayad ken siya ngem dadaelena nan makedse.

²¹ Kankanayon ay daydayawek nan apo. Dayawen koma gedan nan am-in ay binoliwna ay eng-enggana.