Salmo 144 - Kalin Apo Dios

¹ Madaydayaw nan apo ay menkamkamangak ay mangpalaing ken sak-en ay makigobat.

² Owen, siya nan menkamkamangak, mangisalsalakan ya taltalkek ta maid om-ommat ken sak-en. Siya nan mang-abak isnan mangbosboso ken sak-en.

³ Et nemnemek en ay napateg ngen nan ipogaw ta nemnemnemem daida?

⁴ Nan biyag di ipogaw et aptiaptik ay kaneg sinkasip-oy et kedeng. Owen, aptik nan agewna ay kaneg nan mamiddan di alin-ew.

⁵ apo, tokabam nan daya ta gomowabka dakat paasoken nan bilbilig ay mangipaila isnan panakabalinmo.

⁶ Menpakimatka gedan is kaneg pana ay magapo ken sik-a ta maiwakat nan mang-ap-apos ken sak-en.

⁷ Isnan kad-am id ngato et mangbadangka. Isalakanmo koma sak-en isnan dadama ay ligatko ay kegmo padakaen sak-en isnan adaem ay danom. Owen, isalakanmo sak-en isnan kabaelan di kailiili

⁸ ay adi polos mang-ibaga isnan tet-ewa ya menkamkampot ay olay no nakasapata.

⁹ Apo Dios, ikantaak sik-a is balo ay kanta dakpay menkotengteng pala ken sik-a

¹⁰ ay mangpangabak isnan mentotolay ya isalakanmo nan baam ay si David ta adi mapatey.

¹¹ Isalakanmo sak-en isnan makedse ya isnan kabaelan di kailiili ay adi polos mang-ibaga isnan tet-ewa ya menkamkampot ay olay no nakasapata.

¹² Nan aan-akmi ay bababallo et napigsada koma ay kaneg nan makneg ay kaiw. Nan aan-akmi pay ay bababai et menbegewda abes koma ay kaneg nan alkos isnan baey di ali.

¹³ Mapno koma nan agamangmi isnan maap-apit. Olay gedan nan kakalnilomi et gawis koma nan panagan-anakda

¹⁴ ya nan bakbakami et omanakda gedan koma is adoado ay maid maal-alisan. Maid koma men-ag-aga ya menseseg-ang isnan il-ilimi.

¹⁵ Nagasat nan ipogaw ay mabindisyonan is kaneg datona. Owen, nagasatda tet-ewa ay si Apo Dios nan Apoda.