Salmo 143 - Kalin Apo Dios

¹ apo, dengngem kad nan lowalok ay nan mensegseg-angak ken sik-a. Songbatam kad sak-en isnan kinalinteg ya kinamatalekmo.

² Adim koma banbanagen sak-en ay baam tay getkek ay managbasol nan am-in isnan pangiilaam.

³ Nangpaligat et nan mang-ap-apos ken sak-en et nang-abaabakda ay kanegda inpatee sak-en isnan menbolinget et kanegak nabayag ay natey.

⁴ Isonga maid et namnamak ya dadama ay maliligatanak.

⁵ Manemnemko nan nallos ay agew daket ipapasnek ay mangnemnemnem isnan inik-ikkam. Owen, nenemnemek nan am-in ay inik-ikkam.

⁶ Ingatok nan ledengko ay menlowalo ken sik-a. Mailiwak ken sik-a ay kaneg nan maewewan nan naaango ay lota is danom.

⁷ apo, dengngem et adi sak-en tay maid et namnamak. Adim koma itabonan sak-en tay no itabonam sak-en et sigolado ay mateyak et.

⁸ Ipanemnemmo ken sak-en ay winakgat nan adi menbalbaliw ay layadmo tay sik-a nan taltalkek. Itdom kad nan daanek isnan menlowalowak ken sik-a.

⁹ apo, mang-isalakanka isnan mang-ap-apos ken sak-en tay sik-a nan menkamkamangak.

¹⁰ Ipagtekmo kad nan laydem ay ikkak tay sik-a nan Diosko. Itolong koma nan gawis ay Ispiritom sak-en isnan daan ay maid maiyeg-egyat.

¹¹ apo, isalakanmo sak-en ay kaneg din inkalim. Owen, isnan kinagawismo et isalakanmo sak-en isnan ligatko.

¹² Gapo isnan adi menbalbaliw ay layadmo et pateyem nan mang-ap-apos ken sak-en. Owen, dadaelem am-in daida ay mang-aamis tay sak-en nan baam.