Salmo 141 - Kalin Apo Dios

¹ apo, mendawatak ken sik-a ta badangam et sak-en. Owen, dengngem kad sak-en no mendawatak ken sik-a.

² Omdan koma nan lowalok ay kaneg nan omdanan nan insenso ay mangpagasgasing ken sik-a ya nan mang-ingatowak isnan ledengko ay menlowalo et kaneg koma nan mang-awatam isnan maidatdaton ay minasdem.

³ apo ipaam-ammam sak-en isnan panagkalkalik. Owen, timbengem nan kankanak ya nan nemnemnemek.

⁴ Adim ipalobos ay maawisak ay men-ikkan is ngawi ta adiyak maitaptapi isnan managbasol isnan mang-ik-ikkananda is ngawi ya adiyak koma gedan makilaglagsak ken daida.

⁵ Gawis ken sak-en no nan nalinteg ay ipogaw nan mangpaosto ken sak-en ngem adiyak polos layden ay nan makedse nan mang-it-ek ken sak-en tay nan ilol-owalok et nan mangtobngal isnan ngawi ay ik-ikkanda.

⁶ No maabak et nan mentotolay isnan mang-ap-apos ken sak-en et awnit patiyenda ay tet-ewa nan kankanak.

⁷ Owen, awnit maabakda et maiwakat nan tolangda isnan igid di pantiyong.

⁸ Ngem sak-en pay et itoltoloyko ay mentaltalek ken sik-a apo ay Diosko. Sik-a nan menkamkamangak, adim ipalobos ay mateyak.

⁹ Mangsalaknibka isnan ngawi ay gandat di makedse ken sak-en.

¹⁰ Daida met laeng ay makedse nan manglikna koma isnan ngawi ay gandatda ngem ken sak-en et maid koma om-ommat.