Salmo 140 - Kalin Apo Dios

¹ apo, isalakanmo sak-en isnan makedse. Salaknibam sak-en ken daida ay mangpalpaligat ken sak-en.

² Kanayon ay mennemnemnemda is ngawi ya sisasaganada ay makigobat.

³ Nan kankananda et omipasakit ay kaneg kedet di oweg. Owen, omipasakit nan kankananda.

⁴ apo, salaknibam sak-en isnan kabaelan di managdakdakes. Owen, salaknibam sak-en isnan makedse ay ipogaw ay mangnemnemnem is maabakak.

⁵ Nan managlastog et nin-isaganada is silo pala ken sak-en ya nin-iwakdada is tali isnan daan ta masalibotanak. Owen, nin-isaganada is silo ay mangsilo koma ken sak-en.

⁶ Daket kanan isnan apo en sik-a nan Diosko. Dengngem kad nan dawatko ay menpabadang.

⁷ apo ay Diosko ay menkamkamangak, sik-a nan mangsalaknib ken sak-en isnan gobat.

⁸ apo, adim koma id-idya nan kayten nan makedse. Owen, adim ipalobos ay maikkanda nan ngawi ay nenemnemenda.

⁹ Isagongmo koma ken daida ay mang-ap-apos ken sak-en nan ngawi ay nemnemnemenda.

¹⁰ Dadama koma nan dosada ay kaneg wadada isnan menbegbegang ay oling ya maitep-ada koma isnan lengaw ta adida et makabala

¹¹ Nan mangpabpabasol isnan iib-ada et adida koma makaikkan isnan nemnemnemenda ya nan ik-ikkan nan makedse nan ommat koma ken daida.

¹² apo, getkek ay badangam nan maaamis ya osto nan pangbanagmo isnan makasapol.

¹³ Daydayawen pay nan nalinteg sik-a ya menteeda isnan kad-am.