Salmo 14 - Kalin Apo Dios

¹ Nemnemen nan menkenteg nan toktokna en, “Ayke od waday Dios?” Am-inda et adida katalek tay ngawi am-in nan ik-ikkanda. Maid polos mang-ikkan is gawis.

² Oosdongan nan apo id daya nan kaipoipogaw ta ilaena no waday olay esa koma is masilib ya no waday olay esa is mangdayaw ken siya.

³ Ngem am-inda et dinokoganda siya isonga ninbalinda ay adi mapaay ay ipogaw. Maid polos mang-ikkan is gawis ay olay esa.

⁴ Kanan nan apo, “Daida ay managbasol, ay adida kaisolowan aya? Akewanda nan ipogawko is menkatagoda ay bakenak is mendawatanda.”

⁵ Ngem awnit palalo nan egyatda tay wada si Apo Dios isnan nalinteg.

⁶ Padasen nan managbasol ay mangseyat isnan panggep nan kodo ngem nan apo nan kamang di kodo.

⁷ Sapay koma ta omdan ay dagos nan magapo id Sion ay mangisalakan isnan Israelita. Awnit pilmi nan gasingda ay ipogaw Apo Dios isnan kasin mangpanam-ayan nan apo ken daida.