Salmo 139 - Kalin Apo Dios

¹ apo, adaadalem sak-en ta getkem nan kaipogawko.

² Getkem am-in ay ik-ikkak ya olay no wadaka isnan ad-addawi et getkem am-in nan nemnemnemek.

³ Ya olay no men-ob-oblaak wenno men-iilengak et iilaem gedan sak-en isonga getkem am-in nan ik-ikkak.

⁴ Esakpay menkali et getkem et nan awnitko kanan.

⁵ Itotoloymo ay mangil-ila ken sak-en et adiyak maitagtagan sik-a.

⁶ Kaskasdaaw nan kinasilibmo isonga adik polos maawatan.

⁷ Into pay ngen di omayak ta itagtagak sik-a wenno mentabonak ta adika makaila ken sak-en.

⁸ No omeyak id daya et wadaka isdi ya olay no ipodanko isnan kad-an di natnatey et wadaka gedan isdi.

⁹ No abes tomayawak ta omeyak isnan balaan di agew wenno menteeak isnan lomnekan di agew

¹⁰ et wadaka kayet isdi ay mang-itolong ken sak-en. Owen, wadaka kayet isdi ay mangbibiyang ken sak-en.

¹¹ Mabalin pay ay kanak en igagon koma nan menbolinget sak-en ya bomolinget nan pat-a isnan kad-ak

¹² ngem nan menbolinget ya labi et menpat-a ken sik-a tay ken sik-a et nan bolinget ya pat-a et paliso.

¹³ Binoliwmo sak-en ya inseinsetmo sak-en isnan eges inak.

¹⁴ Dayawek sik-a tay kaskasdaaw ya ostoosto nan inikkam ay nangboliw ken sak-en. Owen, am-in ay ik-ikkam et kaskasdaaw et getkek dana tet-ewa.

¹⁵ Gintekmo et sak-en isdin adi kaiila ay masapsapowak isnan eges inak.

¹⁶ Inilam sak-en esakpay maiyanak. Ya esakpay bomala et epdasmo inlista nan bilang di agewko.

¹⁷ Apo Dios, napatepateg nan mangnemnemnemam ken sak-en et adiyak makabilang isnan kaad-adona

¹⁸ tay no padasek ay bilangen et ad-ado mo nan lagan. Dat no magidowak et daan pay laeng ay nemnemnemem sak-en.

¹⁹ Apo Dios, pateyem koma nan managdakdakes. Kaytek ay taynan nan makedse sak-en

²⁰ tay menkalida is ngawi maipanggep ken sik-a. Owen, ngawingawi nan kankananda.

²¹ apo, kaliligetko nan mangliliget ken sik-a ya iyawek nan mang-ap-apos ken sik-a.

²² Dadama ay kaliligetko daida ya ibilangko daida ay kaneg gedan mang-ap-apos ken sak-en.

²³ Apo Dios adalem sak-en ta getkem nan wada isnan nemnemko. Padasem sak-en ta magtekam nan nemnemnemek

²⁴ ya manggetkam no waday ngawi ken sak-en dakat itolong sak-en isnan daan ay omey isnan biyag ay maid patenggana.