Salmo 138 - Kalin Apo Dios

¹ Men-iyamanak ken sik-a apo isnan am-in ay kabaelak. Ya ikantak nan pangdayawko ken sik-a isnan sagang nan mentotolay isnan batawa.

² Menpalintomengak isnan sagang nan baeymo ya dayawek sik-a gapo isnan adi menbalbaliw ay layad ya talekmo tay napatpateg nan inik-ikkam ya insapatam isnan am-in.

³ Dinngem nan dawatko isdin nindawatak ken sik-a ya pinatoltoledmo sak-en.

⁴ apo, dayawen koma nan am-in ay aali isnan batawa sik-a isnan nangdengnganda isnan inbagbagam.

⁵ Awnitda kantaen nan maipanggep nan inik-ikkam tay dadama nan dayawmo.

⁶ Olay no nangato nan apo et ayowanana kayet nan nababa ngem nan ik-ikkan di men-et-etek et gegetkena.

⁷ Olay no dadama nan ligatko et egaymo inpalobos ay waday ommat ken sak-en. Ya dosaem nan mang-ap-apos ay dadama nan ligetda ken sak-en ya mangisalakanka isnan panakabalinmo.

⁸ Ikkan nan apo am-in ay inkalina ya nan adi menbalbaliw ay layadna et maid patenggana. apo, adim kad baybay-an sak-en.