Salmo 137 - Kalin Apo Dios

¹ Isdin tomotokdowanmi isnan benget di ginawang di Babilonia et nin-aga kami isdin nangnemnemanmi isnan Sion.

² Insakkeymi nan kotengtengmi isnan kak-aiw isdi

³ ngem kayten nan nangdepap ken dakami ay menkanta kami. Kaytenda ay menlagsak kami ya kananda pay en, “Ikantaanyo dakami is kanta maipanggep nan Sion.”

⁴ Ayke mabalin ay kantaenmi nan kanta ay men-gasgasing dapay wada kami isnan teken ay ili?

⁵ Adiyak et koma kasin menkotkotengteng no kalingkingak nan ili ay Jerusalem.

⁶ Adiyak gedan menkankanta kasin no kalingkingak siya ya no adiyak nemnemen ay nan Jerusalem nan kagagasingko isnan am-in.

⁷ apo, nemnemem din inikkan di Edomita isdin agew ay nanggowadanda isnan Jerusalem. Nemnemem pod din kankananda ay, “Bakasen tako engganay pilmi ay madadael.”

⁸ Awnit madadael nan ili ay Babilonia ya nan mentetee isdi. Nagasat nan ipogaw ay men-ibaes ken daida gapo isnan inikkanda ken dakami.

⁹ Nagasatda ay mang-ala isnan an-ak di iBabilonia dadat ipakpak daida isnan batbato.