Salmo 135 - Kalin Apo Dios

¹ Daydayawenyo nan apo. Owen, daydayawenyo nan apo, dakayo ay baana

² ay tomatakdeg ay mensilsilbi isnan pantew di baey nan apo ay Dios tako.

³ Dayawenyo nan apo tay gawis siya. Ikantayo nan pangdayawyo ken siya tay kagagasing.

⁴ Dayawenyo nan apo tay pinilina nan aap-on din si Jacob ay daida ay Israelita ta men-ipogawna.

⁵ Getkek ay napateg nan apo tako. Owen, napatepateg isnan am-in.

⁶ Ikkana nan kagagasingna isnan daya ya isnan batawa ya isnan baybay ya isnan daemna.

⁷ Siya nan mangipangato isnan liboo isnan solsolin nan batawa. Ya pabal-ena nan kimat ay maikadkadwa isnan odan ya pabal-ena gedan nan dagem isnan nang-idolinana.

⁸ Pinateyna pay nan iyon-a ay an-ak di iyEgipto ya nan anak di tatalakenda.

⁹ Inikkana nan kaskasdaaw ay mangdosa isnan ali ya nan itoltolayan nan ali id Egipto.

¹⁰ Dinadaelna nan kailiili ya pinateyna nan ninkapipigsa ay aali

¹¹ ay da Sihon ay alin di Amorreo, si Og ay alin di Basan ya nan am-in ay ali id Canaan.

¹² Danat ipatawid nan dagan nan naayday aali isnan ipogawna ay Israelita.

¹³ Sik-a apo et wawawawadaka ay eng-enggana. Adi polos kalkalingkingan nan aap-on di ipogaw is kasin enggana is komasin sik-a

¹⁴ tay awnit salakniban nan apo nan ipogawna ya seg-angana nan babaana.

¹⁵ Nan tinagtagon di il-ili ay daydayawenda et aped sinokog di ipogaw isnan palata ya balitok.

¹⁶ Wada nan topekda ngem adida makakali ya wada nan matada ngem adida makaila.

¹⁷ Wada pay nan ingada ngem adida makadnge dapay maid pay leng-agda.

¹⁸ Am-in ay mangsapo ya mangtalek isnan tinagtago et kanegda gedan nan sapsapowenda.

¹⁹ Dakayo ay Israelita, dayawenyo nan apo. Dakayo pay ay papadin nan apo, dayawenyo siya.

²⁰ Dakayo abes ay Levita, dayawenyo nan apo. Ya dakayo ay mangpateg isnan apo, dayawenyo siya.

²¹ Dayawenyo nan apo ay mentetee id Sion ay makwani gedan en Jerusalem. Owen, dayawenyo nan apo.