Salmo 132 - Kalin Apo Dios

¹ apo, adim kalkalingkingan si David ya nan ligatna ay intoltoledna.

² Nenemnemem apo nan inkalina ken sik-a ay manakabalin ay Dios din si Jacob.

³ Insapatana en, “Adiyak somasaa wenno omey ipodan

⁴ ya adiyak men-il-illeng wenno maseyseyep

⁵ enggana ay waday das-ak is mentean nan manakabalin ay Dios din si Jacob. Owen, enggana ay wada nan mentean nan baol di tolag ay mangipagtek isnan kawad-an nan apo.”

⁶ Isnan nang-an-anapanmi isnan baol ay naipay-an di tolag et dinngemi ay wada id Betlehem ngem nan nangdas-anmi et isnan om-a id Jaar.

⁷ Dakamit kanan en, “Omey tako mendayaw isnan sagang nan apo.”

⁸ apo, menteeka et isnan osto ay team. Owen, sik-a ya nan baol di tolag ay mang-ipagtek isnan kabaelam.

⁹ Nalinteg koma nan ik-ikkan di papadim ya menkanta koma nan ipogawmo isnan gasingda.

¹⁰ Gapo isnan insapatam ken David ay baam et adim dokdokogan siya ay pinilim.

¹¹ Ninsapata nan apo ken David et adina babawiyen. Insapatana en, “Wadada nan ipatolayko isnan polim ay mentolay ay maisned ken sik-a.

¹² Et no adi dokdokogan nan aan-akmo nan tolagko ya tongpalenda nan bilbilinko et awnit abes mentolay nan polida ay eng-enggana.”

¹³ Pinilin nan apo nan Sion tay kaytena ay isdi nan menteana.

¹⁴ Kanan nan apo en, “Isna nan menteak ay eng-enggana. Owen, isna nan kaytek ay mentolayan.

¹⁵ Itedko ken daida id Sion nan am-in ay masapolda dakpay peneken nan kodokdo ay mentetee isdi.

¹⁶ Bindisyonak nan papadi isnan am-in ay ik-ikkanda dapay abes menkanta nan kaipoipogaw is gasingda.

¹⁷ Awnitko ipatolay nan esay apon David daket adi pamamaiden nan mentolayana ay pinilik ay ali.

¹⁸ Awnitko baibainan nan mang-ap-apos ken David daket panam-ayen nan mentolayana.”