Salmo 125 - Kalin Apo Dios

¹ Daida ay mentalek isnan apo et kanegda nan bilig ay Sion ay adi polos mawedwed nodi makneg ay eng-enggana.

² Kaneg nan kawad-an di bilbilig ay mangliliwes isnan Jerusalem nan kaneg nan mangsasalakniban nan apo isnan ipogawna id wani et enggana.

³ Baken eng-enggana nan mentolayan di managdakdakes isnan dagan di nalinteg tay no keg todi et awnit abes maalisan nan nalinteg is ngawi.

⁴ apo, badangam nan mang-ik-ikkan is gawis ya nan mangtongpal isnan bilbilinmo.

⁵ Ngem nan ipogaw nan apo ay mangdokog ken siya et itapin nan apo ay mangdosa ken daida isnan mangdosaana isnan managdakdakes. Maoolnos koma nan Israelita.