Salmo 119 - Kalin Apo Dios

¹ Nagasat nan maid polos madelawanda ay maiwanwaned isnan linteg nan apo.

² Nagasat nan mangtongtongpal isnan bilbilina ay manglayad ay mensilbi ken siya isnan am-in ay kabaelanda.

³ Maid polos ik-ikkanda is ngawi ya nan apo nan mang-iwanwaned ken daida.

⁴ apo, insolom ken dakami nan lintegmo dakamit ostoosto ay tongpalen.

⁵ Sapay koma ta sak-en et tet-ewa ay tongpalek nan lintegmo.

⁶ Owen, no tongpalek ay osto nan bilinmo et awnitak adi polos mabab-ainan.

⁷ Maid dowadowan nan mangdaydayawak ken sik-a isnan mangsolowak isnan nalinteg ay pangbanagmo.

⁸ Tongpalek nan lintegmo isonga adim koma polos baybay-an sak-en.

⁹ Ngan pay di ikkan di baballo ta maid madeldelawana? Nan ikkana et tongpalena nan lintegmo.

¹⁰ Isnan am-in ay kabaelak et kalalayadko ay mensilbi ken sik-a. Adim koma itolok ay adiyak tongpalen nan bilbilinmo.

¹¹ Ipasnekko isnan nemnemko nan lintegmo tapno adiyak makabasol ken sik-a.

¹² Daydayawek sik-a apo. Isolom kad ken sak-en nan lintegmo.

¹³ Ibagbagak nan am-in ay pangbanag ay ibagam.

¹⁴ Magasgasinganak isnan bilbilinmo ay kaneg nan gasing di ipogaw isnan kinabaknangna.

¹⁵ Ipasnekko ay mangnemnemnem isnan bilbilinmo dakpay ipasnek ay mangnemnemnem isnan isolsolom.

¹⁶ Magasinganak isnan lintegmo et adiyak kalkalingkingan nan kankanam.

¹⁷ Gagawisem kad ken sak-en ay baam tapno matagotagowak ay mangtongtongpal isnan isolsolom.

¹⁸ Bitagem nan matak tapno mailak nan kinakaskasdaaw nan lintegmo.

¹⁹ Kanegak sangaili isnan batawa isonga adim idolin nan bilbilinmo ken sak-en.

²⁰ Komapsotak et pay isnan mangbigbigawak ay manggetek isnan pangbanagmo.

²¹ Sik-a nan mangtobngal isnan men-et-etek. Mabaosda koma ay adi mangtongpal isnan bilinmo.

²² Wayaam sak-en isnan mangbab-ainanda ya nan mang-am-amisanda ken sak-en tay tinongtongpalko nan bilbilinmo.

²³ Olay no mentotya nan mentotolay dadapay mennemnemnem is ikkanda ken sak-en et ipasnekko ay mangnemnemnem kayet isnan lintegmo.

²⁴ Magasinganak isnan bilbilinmo tay daida nan mangbagbaga ken sak-en.

²⁵ Nalakaak ay maaw-awis isnan ngawi ay ogalin di ibatawa isonga papigsaem kad sak-en ay kaneg nan inkalim.

²⁶ Inbagak am-in ay inik-ikkak et dinngem sak-en. Isolom kad nan kaytem ay ik-ikkak.

²⁷ Badangam sak-en ay mang-awat isnan lintegmo ta ipasnekko ay mangnemnemnem isnan kaskasdaaw ay ik-ikkam.

²⁸ Mentedted nan agak gapo is seg-angko. Papigsaem koma sak-en ay kaneg din inkalim.

²⁹ Adim ipalobos ay maiyaw-awanak et isnan kinagawismo et isolom kad ken sak-en nan lintegmo.

³⁰ Pinilik ay adiyak dokdokogan sik-a ya tongpalek nan pangbanagmo.

³¹ apo, solsolotek nan bilbilinmo isonga adim koma ipalobos ay mabainanak.

³² Adiyak kalkalingkingan ay ikkan nan bilbilinmo tay an-anayam nan panang-awatko.

³³ Isolom ken sak-en apo nan kayat ay kanan nan lintegmo daket tongtongpalen isnan matatagowak.

³⁴ Ipakaawatmo ken sak-en ta tongpalek. Owen, tongpalek isnan am-in ay kabaelak.

³⁵ Iwanedmo sak-en isnan bilbilinmo tay siya nan mangpalagsak ken sak-en.

³⁶ Ipaipasnekmo ken sak-en ay mangtongtongpal isnan bilbilinmo ta baken nan kinaagom is nemnemnemek.

³⁷ Adim ipalobos ay nemnemnemek nan maid silbina dakat mangbadang tapno managtongpalak.

³⁸ Ipaknegmo din inkalim ken sak-en ay baam, din inkalim isnan mangpatpateg ken sik-a.

³⁹ Kaanem kad nan maibabainak ay iyeegyatko tay gawigawis nan pangbanbanagmo.

⁴⁰ Laydek ay tongpalen nan lintegmo. Papigsaem kad sak-en isnan kinalintegmo.

⁴¹ Apo, ipailam kad ken sak-en nan adi menbalbaliw ay layadmo dakat mang-isalakan ay kaneg din inkalim

⁴² tapno masongbatak nan mangdadadael ken sak-en gapo tay talkek nan kalim.

⁴³ Badangam sak-en ay mangwani isnan tet-ewa tay nan namnamak et nan pangbanagmo.

⁴⁴ Tongtongpalek nan lintegmo isnan matatagowak.

⁴⁵ Matatagowak ay siwawaya tay inadalko nan lintegmo.

⁴⁶ Awnitko gedan ibaga nan bilbilinmo isnan aali et adiyak mabainan.

⁴⁷ Men-gasingak ay mangtongtongpal isnan kalalayadko ay bilbilinmo.

⁴⁸ Owen, patgek nan bilbilinmo ay laylaydek ya ipasnekko ay mangnemnemnem isnan isolsolom.

⁴⁹ Adim kad kalkalingkingan nan inkalim ken sak-en ay baam tay siya nan namnamak.

⁵⁰ Siya na nan mangliwliwaliw ken sak-en isnan ligatko tay nan inkalim nan mangtatago ken sak-en.

⁵¹ Mang-iiyaw nan etek ay ipogaw ngem adiyak kayet baybay-an nan lintegmo.

⁵² apo, no nemnemek nan pangbanbanagmo et maliwliwaliwanak.

⁵³ Mensesese nan ligetko gapo isnan ik-ikkan di makedse ay adi mangpati isnan lintegmo.

⁵⁴ Isnan matatagowak isnan batawa et magasgasinganak isnan lintegmo.

⁵⁵ Isnan labi et manemnemko sik-a dakpay ipasnek ay mangnemnem isnan lintegmo.

⁵⁶ Siya na ay kanayon nan ik-ikkak tay tongtongpalek nan lintegmo.

⁵⁷ apo, sik-a nan magapgapowan nan am-in ay masapolko. Isapatak ay tongpalek nan ibagbagam.

⁵⁸ Dawatek ken sik-a isnan kabaelak ta mangseg-angka ay kaneg din inkalim.

⁵⁹ No nemnemek nan ogalik daket menbalbaliw et tongpalek nan bilbilinmo.

⁶⁰ Adiyak mentaktak nodi dagos ay tongpalek nan bilbilinmo.

⁶¹ Olay no liniwes nan makedse sak-en et adiyak kayet kalkalingkingan nan lintegmo.

⁶² Isnan tengan di labi et magidowak ay mangdaydayaw ken sik-a gapo isnan nalinteg ay pangbanagmo.

⁶³ Makikadwaak isnan am-in ay mangpateg ken sik-a ay daida ay mangtongpal isnan lintegmo.

⁶⁴ apo, adi kakak-aan nan layadmo isnan batawa. Isolom kad ken sak-en nan lintegmo.

⁶⁵ apo, gagawisem nan ik-ikkam ken sak-en ay baam ay kaneg din inkalim.

⁶⁶ Isolowam kad sak-en ay somilib ya lomaing tay patiyek nan bilbilinmo.

⁶⁷ Id kasin et inik-ikkak nan ngawi isonga napaligatak ngem id wani, patiyek et nan bilinmo.

⁶⁸ Gawigawiska isonga gawis gedan nan am-in ay ik-ikkam. Isolom ngalod ken sak-en nan lintegmo.

⁶⁹ Nan men-et-etek et mangpabasbasolda ngem ipapasnekko kayet ay mangtongpal isnan lintegmo.

⁷⁰ Adida pay patgen nan isolsolom dapay kayet gomawis nan kabibiyagda. Ngem olay no keg todi et magasgasinganak kayet isnan lintegmo.

⁷¹ Paggawisak nan napaligatak tapno masolok dadlo nan lintegmo.

⁷² Ken sak-en et napateg nan lintegmo mo nan linibo ay balitok ya palata.

⁷³ Nangboliwka ya ginawigawismo nan kaipogawko. Ipakaawatmo ken sak-en tapno maawatak nan lintegmo.

⁷⁴ Nan mangpateg ken sik-a et gomasingda no mang-ilada tay mentaltalekak isnan kalim.

⁷⁵ apo, getkek ay ostoosto nan pangbanbanagmo et gapo isnan kinamatalekmo et mapaligatak.

⁷⁶ Nan adi menbalbaliw ay layadmo koma nan mangliwliwaliw ay kaneg din inkalim ken sak-en ay baam.

⁷⁷ Maseg-angka koma ken sak-en ta matagotagowak tay isnan lintegmo et magasgasinganak.

⁷⁸ Mabainan koma nan men-et-etek tay mangpabpabasolda is maid gapona. Ngem sak-en pay et ipasnekko ay mangnemnemnem isnan lintegmo.

⁷⁹ Makikadwa koma ken sak-en nan mangpateg ken sik-a, daida ay mangtongpal isnan bilbilinmo.

⁸⁰ Maid koma mangdeldelaw isnan mangtongtongpalak isnan lintegmo tapno adiyak maibabain.

⁸¹ apo, nabannogak et ay mangseseed isnan mang-isalakanam ken sak-en ngem mentalekak kayet isnan kalim.

⁸² Owen, nabannogak et ay mangseseed isnan inkalim. Kankanak pay en, “Tongona pay di mangliwaliwam ken sak-en?”

⁸³ Tay maid et silbik ay kaneg nan naiwasit ay kodil ay naipaypay-an di basi ngem adiyak kayet kalkalingkingan nan lintegmo.

⁸⁴ Ngan pay nan kabaybayag di menseseedak? Tongona pay di mangdosaam isnan mangpalpaligat ken sak-en?

⁸⁵ Nan men-et-etek ay adi mangtongpal isnan lintegmo et kanegda ninkaot is bito ay mangbitowanda koma ken sak-en.

⁸⁶ Matalek am-in ay bilbilinmo. Badangam sak-en tay mangpalpaligat nan men-et-etek isnan mangpabpabasolanda ken sak-en.

⁸⁷ Ngannganida mangpatey ngem egayko kayet binaybay-an nan lintegmo.

⁸⁸ Payap-ewem nan liknak isnan adi menbalbaliw ay layadmo tapno tongpalek nan bilbilinmo.

⁸⁹ apo, nan kalim et maid patenggana ya komekeneg id daya.

⁹⁰ Nan kinamatalekmo et maid patenggana. Pinakenegmo nan batawa et adi kaiwedwed.

⁹¹ Am-in ay binoliwmo et mentoltoloy enggana id wani tay am-in dana et daida nan baam.

⁹² No baken nan lintegmo is magapgapowan di lagsakko et waay nateyak et isnan ligatko.

⁹³ Adiyak polos kalkalingkingan nan lintegmo tay siya nan gapo ay matatagowak.

⁹⁴ Kowam sak-en isonga isalakanmo sak-en tay tongtongpalek nan lintegmo.

⁹⁵ Olay no mangseseed nan makedse ay mangpatey ken sak-en ngem tongpalek kayet nan bilbilinmo.

⁹⁶ Nagtekak ay nan am-in et wada nan menpatenggaanda ngem nan bilbilinmo et maid menpatenggaana.

⁹⁷ Laylaydek nan lintegmo. Siya nan ipasnekko ay nemnemnemen isnan siagew.

⁹⁸ Nan bilinmo et wada ken sak-en ay kankanayon ya pabalinena sak-en ay masilsilib mo nan mang-ap-apos ken sak-en.

⁹⁹ Mas makaawatak mo nan mimistolok tay ipasnekko ay mangnemnemnem isnan lintegmo

¹⁰⁰ ya masilsilibak pay mo nan aamam-a tay tongpalek nan lintegmo.

¹⁰¹ Dokogak am-in ay ngawi tapno tongpalek nan kalim.

¹⁰² Adiyak baybay-an nan pangbanagmo tay sik-a mismo nan mang-isolsolo ken sak-en

¹⁰³ et gawigawis nan isolsolom. Owen, gawgawis pay mo nan dilo.

¹⁰⁴ Isnan lintegmo nan magapowan di panakaawatko isonga am-in ay ngawi et kaliligetko.

¹⁰⁵ Nan kalim nan silaw ay mang-iwanwaned ken sak-en et sisilawana nan daanko.

¹⁰⁶ Ninsapataak et ipatet-ewak et ay mangtongpal isnan nalinteg ay pangbanagmo.

¹⁰⁷ Dadama ay mendagsen nan ligatko. Papigsaem koma sak-en apo, ay kaneg din inkalim.

¹⁰⁸ apo, dawatem nan pangdayawko ay men-iyaman ken sik-a ya isolowam sak-en isnan pangbanagmo.

¹⁰⁹ Olay no namin-ado ay gistayak matey ngem egayko kayet kalingkingan nan lintegmo.

¹¹⁰ Nin-ipakat pay nan makedse is silo pala ken sak-en ngem egayko kayet binaybay-an nan lintegmo.

¹¹¹ Nan bilbilinmo nan tawidko ay eng-enggana. Owen, daida nan gasingko.

¹¹² Ninemnemko ay ipasnek ay mangtongpal isnan lintegmo enggana ay mateyak.

¹¹³ Kaliligetko nan mendowadowa isnan nemnemda ngem sak-en pay et laylaydek nan lintegmo.

¹¹⁴ Sik-a nan salaknibko ya salidak. Nan inkalim nan kad-an di namnamak.

¹¹⁵ Dakayo ay makedse, komaan kayo tapno matongpalko nan bilbilin nan Diosko.

¹¹⁶ Apo, badbadangam kad sak-en ay kaneg din inkalim ta matatagowak. Adim ipalobos ay mapaay nan namnamak.

¹¹⁷ Owen, mangbadangka ta maid ommat ken sak-en ya ta adiyak baybay-an nan lintegmo.

¹¹⁸ Sik-a et adim ikaskaso nan adi mangtongpal isnan lintegmo tay maid silbin nan men-al-allilawanda.

¹¹⁹ Isnan pang-iilaam et am-in ay makedse et wasitda isonga laylaydek nan bilbilinmo.

¹²⁰ Menpayegpegak is egyatko ken sik-a ya iyegyatko nan pangbanbanagmo.

¹²¹ Inikkak nan osto ya nan gawis. Adim koma baybay-an sak-en isnan kabaelan di mang-aamis ken sak-en.

¹²² Apo, tet-ewa ay kawkawanam sak-en ay baam. Adim koma ipalobos ay mang-aamis nan men-et-etek.

¹²³ Sinmakit nan matak ay mangseseed isnan mangisalakanam ken sak-en ya nan matongpalan nan nalinteg ay inkalim.

¹²⁴ Seg-angam sak-en ay baam gapo isnan adi menbalbaliw ay layadmo ya isolowam kad sak-en isnan lintegmo.

¹²⁵ Sak-en nan baam isonga ipakaawatmo ken sak-en tapno getkek nan bilbilinmo.

¹²⁶ Apo, id wani nan men-gonayam tay adiyet tongtongpalen nan ipogaw nan lintegmo.

¹²⁷ Tet-ewa ay laylaydek nan bilbilinmo. Owen, laylaydek mo nan balitok.

¹²⁸ Isonga ken sak-en et pinilik nan lintegmo ay mang-iwanwaned ken sak-en et adyak nan baken tet-ewa ay maik-ikkan.

¹²⁹ apo, gawigawis nan bilbilinmo isonga tongpalek isnan am-in ay kabaelak.

¹³⁰ Nan kalim nan mangsilaw isnan daan di ipogaw et pasilibena nan ipogaw ay nalaka ay maaw-awis.

¹³¹ Nabannogak isnan mangbigbigawak isnan bilbilinmo.

¹³² Sagongem sak-en ya mangseg-angka ay kaneg nan ik-ikkam isnan am-in ay manglaylayad ken sik-a.

¹³³ Takdowem sak-en ay kaneg din inkalim ya adim ipalobos ay mang-abak nan ngawi.

¹³⁴ Sobtem sak-en isnan mang-aamis ken sak-en tapno matongpalko nan lintegmo.

¹³⁵ Bindisyonam kad sak-en ya isolowam sak-en isnan lintegmo.

¹³⁶ Men-ayos nan agak gapo tay adi tongpalen di ipogaw nan lintegmo.

¹³⁷ Nalintegka apo, ya ostoosto nan pangbanbanagmo.

¹³⁸ Nan bilbilin ay inidyam et nalinteg ya matalek.

¹³⁹ Mensesese nan ligetko gapo tay baybay-an nan mang-ap-apos nan ibagbagam.

¹⁴⁰ Tet-etet-ewa nan inkalim et sak-en ay baam et laylaydek.

¹⁴¹ Nababaak ya maiiyawak ngem adiyak kayet kalkalingkingan nan lintegmo.

¹⁴² Nan kinalintegmo et maid patenggana ya tet-etet-ewa nan lintegmo.

¹⁴³ Olay no madadanaganak ya mapalpaligatak ngem mangpagasgasing kayet nan bilbilinmo.

¹⁴⁴ Nalinteg nan bilbilinmo ay eng-enggana. Ipakaawatmo kad ken sak-en ta matagotagowak.

¹⁴⁵ Apo, mendawatak ken sik-a isnan am-in ay kabaelak. Dengngem kad sak-en daket tongpalen nan lintegmo.

¹⁴⁶ Mendawatak ken sik-a ta isalakanmo sak-en ta tongpalek nan lintegmo.

¹⁴⁷ Esapay bomala nan agew et ninpabadangak ken sik-a. Nan inkalim nan kad-an di namnamak.

¹⁴⁸ Olay isnan labi et ipasnekko ay mangnemnemnem isnan inkalim.

¹⁴⁹ Dengngem sak-en apo isnan adi menbalbaliw ay layadmo ya isnan kinaostom et pabaybayagem nan biyagko.

¹⁵⁰ Somagsag-en et nan makedse ay mangpalpaligat ken sak-en ay mang-adi isnan lintegmo.

¹⁵¹ Ngem naisasag-enka ken sak-en apo ya tet-ewa am-in nan bilbilinmo.

¹⁵² Enggana id kasin et getkek ay mentoltoltoloy nan bilbilinmo.

¹⁵³ apo, nemnemem koma nan ligatko ya mang-isalakanka tay adiyak kalkalingkingan nan lintegmo.

¹⁵⁴ Itakdegam sak-en ya mangsobotka. Mangpapigsaka ay kaneg din inkalim.

¹⁵⁵ Naligat nan maisalakanan nan makedse tay adida tongpalen nan lintegmo.

¹⁵⁶ Ngem dadama ay managseg-angka apo isonga mangpapigsaka gapo isnan kinaostom.

¹⁵⁷ Adoado nan mang-ap-apos ya mang-aamis ken sak-en ngem adiyak baybay-an nan bilbilinmo.

¹⁵⁸ No ilaek nan aginsisingpet et maingeak tay adida tongpalen nan bilbilinmo.

¹⁵⁹ Nemnemem apo, nan manglaylaydak isnan lintegmo. Gapo isnan adi menbalbaliw ay layadmo et pabaybayagem nan biyagko.

¹⁶⁰ Nan kalim et tet-etet-ewa ya nan nalinteg ay pangbanbanagmo et maid patenggana.

¹⁶¹ Mang-aamis nan nangangato ay ipogaw ay maid gapona ngem patgek kayet nan kalim.

¹⁶² Men-gasingak isnan inkalim ay kaneg nan nang-edas is napateg ay gameng.

¹⁶³ Kaliligetko am-in nan oaken tet-ewa ngem nan lintegmo et laylaydek.

¹⁶⁴ Maminpito isnan inagew ay mendayawak ken sik-a isnan nalinteg ay pangbanagmo.

¹⁶⁵ Natalna nan nemnem di ipogaw ay manglaylayad isnan lintegmo et maid polos makaamis ken daida.

¹⁶⁶ Sesed-ek sik-a apo ay mang-isalakan ken sak-en ya tongpalek nan bilbilinmo.

¹⁶⁷ Owen, tongpalek nan bilbilinmo tay laylaydek daida.

¹⁶⁸ Tongpalek nan linteg ya bilbilinmo tay gegetkem nan am-in ay ik-ikkak.

¹⁶⁹ apo, omdan koma ken sik-a nan dawatko. Ipakaawatmo ken sak-en ay kaneg din inkalim.

¹⁷⁰ Dengngem koma nan lowalok. Isalakanmo sak-en ay kaneg din inkalim.

¹⁷¹ Daydayawek sik-a tay isolsolom ken sak-en nan lintegmo.

¹⁷² Mendayday-engak maipanggep isnan ibagbagam tay osto nan bilbilinmo.

¹⁷³ Kanayonka koma ay mensasagana ay mangbadang ken sak-en tay pinilik ay mangtongpal isnan lintegmo.

¹⁷⁴ Apo, sesed-ek nan men-isalakanam ya kagagasingko nan lintegmo.

¹⁷⁵ Mangtagotagoka koma ta daydayawek sik-a. Et nan pangbanbanagmo nan mangbadbadang ken sak-en.

¹⁷⁶ Naamasak ay kaneg nan naamas ay kalnilo isonga anapem kad sak-en ay baam tay adiyak kalkalingkingan nan bilbilinmo.