Salmo 118 - Kalin Apo Dios

¹ Men-iyaman tako isnan apo tay gawis siya ya nan adi menbalbaliw ay layadna et maid patenggana.

² Kankanan koma nan Israelita en, “Nan adi menbalbaliw ay layadna et maid patenggana.”

³ Kankanan koma nan papadi ay aap-on din si Aaron en, “Nan adi menbalbaliw ay layadna et maid patenggana.”

⁴ Ya kankanan koma gedan nan mang-ipateg isnan apo en, “Nan adi menbalbaliw ay layadna et maid patenggana.”

⁵ Isnan maliligatak et nindawatak isnan apo danat dengngen sak-en et wayaana sak-en.

⁶ Isnan mangtatakdowan nan apo ken sak-en et maid egyatko tay ngan di aped ikkan di ipogaw ken sak-en?

⁷ Nan apo nan mangbadbadang ken sak-en et men-gasingak ay mang-ila isnan maabakan nan mangliliget ken sak-en.

⁸ Gag-awis ay menkamang isnan apo mo nan taltalken nan ipogaw.

⁹ Owen, gag-awis ay menkamang isnan apo mo nan taltalken nan men-ipangpango.

¹⁰ Liniwes nan kailiili sak-en ngem inabakko daida isnan kabaelan nan apo.

¹¹ Owen, liniwesda sak-en ngem inabakko daida isnan kabaelan nan apo.

¹² Inalibongbonganda sak-en ay kaneg nan alig ya napigsada ay mangsape ken sak-en ay kaneg nan bomidangan di saeng. Ngem inabakko kayet daida isnan kabaelan nan apo.

¹³ Nangdogsolda et gistayak naabak ngem nangbadang nan apo.

¹⁴ Nan apo nan mangpapapigsa ken sak-en et kedkedeng siya is daydayawek. Siya gedan nan mang-isalsalakan ken sak-en.

¹⁵ Madnge nan lagsak di nangabak isnan kad-an di ipogaw Apo Dios ay mangmangwani en, “Kaskasdaaw nan ikkan nan apo isnan panakabalina.

¹⁶ Ya maipangato nan apo isnan nangabakana. Owen, kaskasdaaw nan ikkan nan apo isnan panakabalina.”

¹⁷ Adiyak matey nodi matagowak ta ipagtekko nan inikkan nan apo.

¹⁸ Dadama nan dosana ken sak-en ngem egayna inpalobos ay mateyak.

¹⁹ Tokabam kad nan segpan di nalinteg ta makasgepak ay men-iyaman isnan apo.

²⁰ Siya na nan segpan di Templon nan apo ay kedeng nan nalinteg is makasgep.

²¹ Men-iyamanak apo tay dinngem sak-en et nang-isalakanka.

²² Nan bato ay inadyan di ninsaad is baey et siya nan kapatgan tay ipakekenegna nan baey.

²³ Nan apo nan nang-ikkan is dana et palalo ay kaskasdaaw ken datako.

²⁴ Nan agew ay naay nan nangabakan nan apo isonga men-gasgasing ya menlagsak tako.

²⁵ apo, isalakanmo kad dakami ya dawatenmi gedan ta pagawisem nan kasasaadmi.

²⁶ Mabindisyonan nan men-idaton ay men-iyaman isnan apo. Dakami ay mensilsilbi isnan Templon nan apo et bindisyonanmi dakayo.

²⁷ Nan apo nan Dios ay mangbindisyon ken datako. Iyeyyo et ngalod nan igasingyo isnan altar.

²⁸ Sik-a nan Diosko et men-iyamanak ken sik-a. Owen, sik-a nan Diosko et ipagtekko nan kinapategmo.

²⁹ Men-iyaman tako isnan apo tay gawis siya ya nan adi menbalbaliw ay layadna et maid patenggana.