Salmo 116 - Kalin Apo Dios

¹ Laylaydek nan apo tay dengngena sak-en. Owen, dengngena nan lowalok.

² Gapo tay dengngena nan menlowalowak ken siya isonga isnan matatagowak et siya nan mendawdawatak.

³ Nangliwes nan pang-eg-egyat di tetey et ngannganiyak ay maippey isnan kad-an di natnatey. Nin-ikalowak is danag ya seg-ang

⁴ daket menlowalo isnan apo en, “Pangaasim apo, ta isalakanmo sak-en.”

⁵ Gawis ya managseg-ang nan apo ya manakipaglikna siya ay Dios tako.

⁶ Salakniban nan apo nan maid ngawi isnan nemnemna et insalakana sak-en isdin menligligatak.

⁷ Tomalna dadlo kasin nan nemnemko tay gawigawis nan apo ken sak-en

⁸ Tay insalakan nan apo sak-en isnan tetey danapay pinasaldeng nan agak ya egayna ipalobos ay maabakak.

⁹ Tatakdowen nan apo sak-en isnan tean di matatago.

¹⁰ Itoltoloyko ay mamati ay olay no kinwanik en, “Dadama nan ligatko.”

¹¹ Ya olay no kinwanik isdin omeegyatak en, “Maid pay ipogaw is matalek.”

¹² Ngan aya nan isobalitko isnan apo isnan am-in ay kagawisna ken sak-en?

¹³ Awnitak omyali is basi ay idatonko isnan apo ta men-iyamanak ken siya isnan nang-isalakanana ken sak-en.

¹⁴ Isnan madagdagopan nan am-in ay ipogawna et tongpalek din inkalik isnan apo.

¹⁵ Napateg isnan apo nan mateyan nan esa isnan ipogawna.

¹⁶ Apo, sak-en nan baam. Mensilbiyak ken sik-a ay kaneg din inikkan ina. Nangwayaka isnan ligatko

¹⁷ isonga idyak nan igasingko ay men-iyaman dakpay daydayawen sik-a.

¹⁸ Isnan madagdagopan nan am-in ay ipogawmo et tongpalek din inkalik ken sik-a, apo.

¹⁹ Owen, tongpalek isnan pantew di Templom id Jerusalem. Madaydayaw nan apo.