Salmo 115 - Kalin Apo Dios

¹ apo, baken dakami nodi sik-a et kedeng nan maidayaw gapo isnan adi menbalbaliw ay layad ya kinamatalekmo.

² Ayta dan aped sooten nan kailiili en, “Into od nan Diosda?”

³ Nan Diosmi et wada id daya et ik-ikkana nan laydena.

⁴ Ngem nan daydayawenda et tinagtago ay aped sinokog di ipogaw isnan palata ya balitok.

⁵ Wada nan topekda ngem adida makakali ya wada nan matada ngem adida makaila.

⁶ Wada pay nan ingada ngem adida makadnge ya eengda ngem adida makasongsong.

⁷ Wada nan ledengda ngem adida makalikna ya siki ngem adida makadaan dapay maid polos kali is bomala ken daida.

⁸ Am-in ay mangsapo ya mangtalek isnan tinagtago et kanegda gedan nan sapsapowanda.

⁹ Dakayo ay Israelita, talkenyo nan apo tay siya nan mangbadbadang ya mangsalsalaknib ken dakayo.

¹⁰ Dakayo ay aap-on din si Aaron, talkenyo nan apo ay mangbadbadang ya mangsalsalaknib ken dakayo.

¹¹ Ya dakayo pay am-in ay mang-ipateg isnan apo, talkenyo siya ay mangbadbadang ya mangsalsalaknib ken dakayo.

¹² Nenemnemen nan apo datako danapay bindisyonan datako. Owen, awnitna bindisyonan nan Israelita ya nan aap-on din si Aaron.

¹³ Awnitna bindisyonan am-in ay mangpateg ken siya, ay nangato man wenno nababa.

¹⁴ Paadowen koma nan apo dakayo ya nan aan-akyo.

¹⁵ Nan apo ay nangsapo isnan daya ya nan batawa nan mangbindisyon koma ken dakayo.

¹⁶ Id daya nan kad-an nan apo danapay idya nan batawa isnan ipogaw.

¹⁷ Baken nan natey is mangdayaw isnan apo wenno nan inmey isnan kad-an di natnatey

¹⁸ nodi datako ay matatago nan mangdaydayaw ken siya id wani et eng-enggana. Madaydayaw nan apo.