Salmo 114 - Kalin Apo Dios

¹ Isdin kinmaanan nan Israelita ay ap-on din si Jacob id Egipto ay ili ay teken nan kalida

² et daida ay Juda nan ninbalin ay nadiosan ay ipogaw isnan nintolayan Apo Dios ken daida ay Israelita.

³ Isdin inomdananda isnan baybay ay Gadangdang daet masiyan. Ninsaldeng gedan ay men-ayos nan ginawang ay Jordan.

⁴ Adi makakin-e nan bilbilig ya nan nadodontog ay kanegda nan mentagtagtag ay kalding ya kalnilo.

⁵ Ay tay dan nasiyan nan danom isnan baybay ya dan aped sinmaldeng ay men-ayos nan ginawang ay Jordan?

⁶ Dakayo ay bilbilig ya nadodontog dakayon aped adi makakin-e ay kanegyo nan mentagtagtag ay kalding ya kalnilo?

⁷ Menyegyeg nan batawa isnan omaliyan nan apo. Owen, menyegyeg isnan kawad-an nan Dios din si Jacob,

⁸ nan Dios ay nangpabalin isnan bato is napoposong ay danom. Owen, pinaayosna nan danom isnan batbato.