Salmo 112 - Kalin Apo Dios

¹ Madaydayaw nan apo. Nagasat nan ipogaw ay mangpatpateg isnan apo ya magasingan ay mangtongtongpal isnan bilbilina.

² Nan aap-ona is kasin et awnit wada nan kabaelanda isnan batawa. Ya awnit mabindisyonanda ay nalinteg.

³ Bomaknang ya komadangyan pay nan pamilyana ya mentoltoloy nan kinalintegna ay eng-enggana.

⁴ Olay no mamingsan ay kaneg menbolinget ken siya et masilawan kayet gapo isnan kinagawisna, kinamanagseg-ang ya kinalintegna.

⁵ Gawis nan ipogaw ay managbadang ya managpaotang dapay ostoosto nan ik-ikkana isnan oblana.

⁶ Nan gawis ay ipogaw et adi polos maab-abak ya adi polos makalkalingkingan ay enggana.

⁷ Adi omegyat ay mangdenge is ngawi ay damag tay napigsa nan pammatina et talkena nan apo.

⁸ Adi madandanagan wenno omeg-egyat enggana ay ilaena nan maabakan nan mang-ap-apos ken siya.

⁹ Manag-ited isnan makasapol ya adi kamkammid nan kinalintegna. Makabael ya maidayaw siya gedan.

¹⁰ Ilaen nan makedse na et makaligetda. Owen, pilmi nan ligetda ngem awnitda mamaid ya adi katongpal nan laydenda.