Salmo 111 - Kalin Apo Dios

¹ Madaydayaw nan apo. Men-iyamanak isnan apo isnan am-in ay kabaelak isnan madadagopan di nalinteg ay ipogawna.

² Kaskasdaaw nan inik-ikkan nan apo isonga am-in ay magasingan isnan naayda et kaytenda ay maawatan.

³ Nadayaw ya napateg am-in ay ik-ikkana ya nan kinalintegna et wada ay eng-enggana.

⁴ Adi ipalobos nan apo ay kalingkingan tako nan kaskasdaaw ay ik-ikkana. Wada nan kinagawis ya kinamanagseg-ang ken siya.

⁵ Idyana nan kanen nan mangpateg ken siya danapay adi polos kalkalingkingan nan nakitolagana.

⁶ Inpailana nan kabaelana isnan ipogawna isnan nang-idyaana ken daida isnan dagan di kailiili.

⁷ Isnan am-in ay ik-ikkana et matalek ya nalinteg siya. Nan am-in ay bilina et matalek

⁸ ya adi kamkammid ay eng-enggana. Nasapo nan naayday bilbilin isnan kinatet-ewa ya kinaosto.

⁹ Winayaana nan ipogawna daet makitolag ken daida is tolag ay eng-enggana. Manakabalin siya ya maid polos kangawina.

¹⁰ No patpatgen nan ipogaw nan apo et somilibda. Et nan ipogaw ay mangtongpal abes isnan bilina et daida nan makaawat. Madaydayaw nan apo ay eng-enggana.