Salmo 11 - Kalin Apo Dios

¹ Ninkamangak met isnan apo dakayot aped kanan ken sak-en en, “Tomagtagka ta omeyka isnan bilig ay kaneg nan tomayawan di koyat no depapenda,

² tay naay isaganan nan makedse nan panada isnan mentatabonanda ta panaanda nan nalinteg ay ipogaw.

³ Ayke od waday maikkan di nalinteg no epdas nakaan nan pegnad ay mangpapalinteg?”

⁴ Nan apo et wada isnan napateg ay templona et mentolay id daya. Iilaena nan kaipoipogaw isnan batawa et getkena nan ik-ikkanda.

⁵ Banagena nan makedse ya nan gawis ay ipogaw ay maid paam-amdena ngem dadama ay kaliligetna nan ipogaw ay mangkaykayat is ngawi.

⁶ Awnitna ipaodan nan menbegbeggang ay oling ya menbidbidang ay asopli ken daida ay ngawi nan ogalida danapay ipadagem nan menpololoos ay dagem ken daida.

⁷ Tay nan apo et nalinteg isonga nan nalinteg abes nan laydena et nan nalinteg ay ipogaw et awnitda makitee ken siya.