Salmo 109 - Kalin Apo Dios

¹ Apo Dios ay daydayawek, adim koma aped igiginek

² tay nan mamakedse ya manag-allilaw et menkalkalida is baken tet-ewa maipanggep ken sak-en.

³ Owen, menkalkalida is ngawi maipanggep ken sak-en dadapay mang-ap-apos is maid gapona.

⁴ Olay no laylaydek ya ilol-owalowak daida et pabasolenda kayet sak-en.

⁵ Ngawi nan ikkanda ken sak-en isnan gawis ay inikkak ken daida dadapay mang-aamis isnan manglaylaydak ken daida.

⁶ Mendotokka kad is makedse ay mang-amis isnan mang-ap-apos ken sak-en ya idalomna gedan koma siya.

⁷ Dat no masomalya et magtekan koma ay nakabasol siya ya olay nan dawatna ay ta mawayaan koma et adi koma gedan maibilang.

⁸ Maap-aptik koma nan biyagna ya maidya koma nan saadna isnan tap-in di ipogaw.

⁹ Mangosowan koma nan an-akna ya mabalo nan asawana.

¹⁰ Nan aan-akna koma et men-atoatonda dadapay menlimlimos is menkatagoda. Mapakaanda koma isnan nadadael ay menteteanda.

¹¹ Alaen koma nan nangpaotang ken siya nan am-in ay kokwana ya alaen koma nan tap-in di ipogaw nan am-in ay ninbannogana.

¹² Maid koma olay esa is mangbadang ken siya wenno mangseg-ang isnan aan-akna ay tinaynana.

¹³ Matey koma am-in ay aan-akna ya makalingkingan koma nan ngadana isnan mamaidan et nan maisned ay ap-ona.

¹⁴ Nenemnemen koma nan apo nan basol di alal-apona ya adina polos pakpakawanen nan basol di inana.

¹⁵ Adi koma kalkalingkingan nan apo nan basolda tapno makalingkinganda koma isnan batawa

¹⁶ tay nan sana ay ipogaw et adina polos seg-angan nan ib-ana nodi inaamis ya pinateyna nan kodo, nan makasapol ya nan kaseseg-ang.

¹⁷ Laylaydena ay menbab-aos isonga mabaos abes koma siya. Adyana ay menbindisyon isonga maiyaddawi koma abes nan bindisyon ken siya.

¹⁸ Itoltoloyna ay menbab-aos ay kaneg siya nan badona isonga liknaena koma nan ngawi ay ommat isnan mabaos.

¹⁹ Owen, ta lilililiknaena koma ay kanegna ibabado.

²⁰ apo, siya dadi koma nan isobalitmo isnan mang-ap-apos ken sak-en. Owen, ken daida ay mangtaytayoktok.

²¹ Ngem sik-a apo ay Diosko, badangam sak-en ay kaneg din inkalim et gapo isnan kagawis nan adi menbalbaliw ay layadmo et mangisalakanka

²² tay kodowak dakpay makasapol ya nakapsokapsotak.

²³ Ngannganiyak mamaid ay kaneg nan alin-ew isnan sedem. Menyap-ew nan awakko ay kanegak maitayaw.

²⁴ Nakapsot nan golok gapo isnan adiyak mangmanganan. Naipket et pay nan kodilko isnan tolangko.

²⁵ Ammengan nan mangdeldelaw sak-en ya no ilaenda sak-en et iwegwegda nan oloda.

²⁶ Badangam sak-en apo ay Diosko ya mang-isalakanka gapo isnan adi menbalbaliw ay layadmo.

²⁷ Ipagtekmo isnan mang-ap-apos ken sak-en ay sik-a apo nan nang-isalakan ken sak-en.

²⁸ Olay no mangbaosda ngem mangbindisyonka kayet. Maabak koma nan mang-aamis ken sak-en ngem sapay koma ta men-gasgasingak ay baam.

²⁹ Dadama koma ay mabainan nan mang-ap-apos ken sak-en. Kanegda ibado koma nan maibabainanda.

³⁰ Awnitak men-iyaman isnan apo ya daydayawek siya isnan madagdagopan di kaipoipogaw

³¹ tay salaknibana nan makasapol ta maisalakan isnan mangwani en pateyenda siya.