Salmo 108 - Kalin Apo Dios

¹ Adi menbalbaliw nan talekko ken sik-a ay Dios. Iday-engko nan pangdaydayawko ken sik-a. Owen, dayawek sik-a apo isnan am-in ay kabaelak

² isnan men-amay ay kanta ay makotengtengan dat isnan tan-o ay magidowak et dayawek sik-a.

³ apo, ipagtekko nan men-iyamanak ken sik-a isnan kaipoipogaw ya daydayawek sik-a isnan kailiili

⁴ tay nan adi menbalbaliw ay layadmo et nangatngato mo nan daya ya nan kinamatalekmo et omdan isnan liboo.

⁵ Apo Dios, maipangatoka koma mo nan daya, ya maipaila koma nan kaidaydayawam isnan batawa.

⁶ Dengngem koma nan lowalok dakat bomadang isnan kabaelam tapno maisalakan nan ipogaw ay laylaydem.

⁷ Isnan kinadios Apo Dios et kinwanina en, “Men-gasingak ay mangbingbingay isnan dagan di Sikem daket iwalas nan tanap di Sucot isnan ipogawko.

⁸ Kowak nan daga ay Galaad ya nan daga ay Manases. Et daida id Efraim nan kanegko panakakalogong tay daida nan salaknibko. Ya daida id Juda nan kaneg panakabaelko tay magapo ken daida nan mang-ipangpango isnan ipogawko.

⁹ Ngem nan daga ay Moab et kanegna nan nalogit ay danom tay atiatik nan pategna ken sak-en. Nan daga pay abes ay Edom et awnitko kowa gedan. Dat isnan mangabakak id Filistea et awnitak menlagsak.”

¹⁰ Apo Dios, sino pay nan mang-iyey ken sak-en isnan ili ay nababaked nan liliwesena? Sino nan mang-ipango ken sak-en id Edom?

¹¹ Ay baken kad sik-a ay mang-adi ken dakami ya mang-adi ay makkey isnan sosoldadomi?

¹² Badangam kad dakami ay mangsape isnan mangbosboso ken dakami tay maid silbin nan badang di ipogaw.

¹³ Mangabak kami isnan kawad-an Apo Dios ken dakami. Siya nan mang-ipangabak ken dakami isnan mangbosboso ken dakami.