Salmo 107 - Kalin Apo Dios

Maikalima Ay Liblo

¹ Men-iyaman tako isnan apo tay gawis siya tay nan adi menbalbaliw ay layadna et maid patenggana.

² Ibagbagan koma nan insalakan nan apo en insalakana daida isnan kabaelan di mang-ap-apos ken daida.

³ Inayagana daida isnan ninteteanda ay il-ilin di sangaili isnan balaan di agew et enggana isnan lomnekan di agew ya isnan am-in ay solsolin di batawa ta isagongna daida isnan osto ay ilida.

⁴ Nan tap-ina ken daida et indaanda isnan pondag ay maid makatobo et adida maanapan nan daan ay omey isnan ili ay menteanda koma.

⁵ Naowat ya naewewda et namaid nan pigsada ya linmokeyda.

⁶ Dadat mendawat isnan apo isnan madadanaganda et isalakana daida isnan ligatda.

⁷ Inpangona daida isnan osto ay daan et engganay inomdanda isnan ili ay menteanda.

⁸ Men-iyamanda koma isnan apo isnan adi menbalbaliw ay layadna ya isnan kaskasdaaw ay inik-ikkana ken daida.

⁹ Tay penekena nan naewew danapay agtan is gawis nan naowat.

¹⁰ Pilmi nan ligat nan tap-ida ay kanegda mentetee isnan menbolinget ya men-ikalkaloda isnan naibalodanda ay nakawalanda

¹¹ tay inadyanda ay mangtongpal isnan bilin Apo Dios dadapay egay inkaskaso nan linteg nan Kangangatowan.

¹² Naipababada gapo isnan pilmi ay ligatda dapay maid et mabalin is ikkanda ya maid mangbadang ken daida.

¹³ Dat isnan madadanaganda et nindawatda isnan apo et insalakana daida isnan mapalpaligatanda.

¹⁴ Winayaana daida isnan mapalpaligatanda ya isnan bomobolingetanda danapay sokpoten nan kawalda.

¹⁵ Men-iyamanda koma isnan apo isnan adi menbalbaliw ay layadna ya isnan kaskasdaaw ay inik-ikkana ken daida

¹⁶ tay bakasena nan segpan ay gambang danapay gopongen nan landok ay seyatda.

¹⁷ Wadada gedan nan solagang ay men-ikalkalo gapo isnan ngawi ay ik-ikkanda ya madosada gapo isnan basbasolda.

¹⁸ Kayayagedda ay mang-iila isnan makan et ngannganida matey.

¹⁹ Dadat mendawat isnan apo isnan madadanaganda et isalakana daida isnan maliligatanda.

²⁰ Pinagawisna daida isnan bilina danapay isalakan daida isnan tetey.

²¹ Men-iyamanda koma isnan apo isnan adi menbalbaliw ay layadna ya isnan kaskasdaaw ay inik-ikkana ken daida.

²² Men-idatonda koma isnan men-iyamananda ya iday-engda nan gasingda ay mang-ibagbaga isnan inik-ikkana.

²³ Wada nan tap-ida isnan bapbapol tay siya nan menlagbowanda is menkatagoda.

²⁴ Inilada nan inik-ikkan nan apo ay nan kaskasdaaw ay inik-ikkana isnan baybay.

²⁵ Tay ninbilin daet mendagem is napigsa et mawada nan dadadadakke ay dalloyon.

²⁶ Naipangato nan bapbapol isnan ngato dat maekdag et kanegda maonog isnan daem nan baybay. Inmegyaegyat nan ipogaw isnan keg todi ay inommat.

²⁷ Kanegda naboteng tay maiwidwiddawidda et kaneg maid silbin nan laing nan mang-itoltolong isnan bapol.

²⁸ Dadat mendawat isnan apo isnan madadanaganda et isalakana daida isnan maliligatanda.

²⁹ Pinasaldengna nan napigsa ay lemlem et inpakin-ena nan dalloyon.

³⁰ Dadat gomasing tay sinmaldeng nan lemlem et ipad-ana daida isnan laydenda ay omayan.

³¹ Men-iyamanda koma isnan apo isnan adi menbalbaliw ay layadna ya isnan kaskasdaaw ay inik-ikkana ken daida.

³² Ipagtekda koma nan kinangatona isnan madadagopan di kaipoipogaw ya dayawenda siya isnan madagdagopan di aamam-a.

³³ Nan apo et mabalin ay angowena nan ginawang ta menbalin is naaango ay lota ya mabalin ay todokena nan balaan ta adi menbala.

³⁴ Pabalinena ay mensidek nan maloweb ay lota gapo isnan kinangawin nan mentetee isdi.

³⁵ Pabalinena gedan nan pondag is napopokong ay danom ya nan naaango ay lota is balaan.

³⁶ Et isdi nan nang-ipateeana isnan ipogaw ay makasapol dadat saaden nan ili ay menteanda et.

³⁷ Sammenda nan paypayew dadapay molaan is obas et adoado nan apitenda.

³⁸ Et isnan bindisyona et omadoadoda ya maid makolkolang isnan bakbakada.

³⁹ Isdin naabakan ya nabainan nan ipogaw Apo Dios isnan pilmi ay maaamisan ya men-ikalkalowanda

⁴⁰ et inpailana isnan olay baknang nan ligetna ya pabaatena daida isnan pondag ay maid makatobo.

⁴¹ Ngem insalakana nan makasapol isnan mapalpaligatanda ya paadoadowena nan pamilyada.

⁴² Inilan nan nalinteg dana dadat men-gasing dapay gominek nan managbasol.

⁴³ Nan masilib et nemnemenda dana koma. Adida koma kalkalingkingan nan adi menbalbaliw ay layad nan apo.