Salmo 106 - Kalin Apo Dios

¹ Madayaw nan apo. Men-iyaman tako isnan apo tay gawis siya ya nan adi menbalbaliw ay layadna et maid patenggana.

² Sinoy makaibaga isnan napateg ay inik-ikkana ya sinoy makadayaw is ostoosto ken siya?

³ Nagasat nan mangtongpal isnan bilbilina ya mang-ik-ikkan isnan osto.

⁴ Nemnemem sak-en apo isnan mangbadangam isnan ipogawmo. Itapim sak-en isnan mang-isalakanam ken daida

⁵ tapno maitapiyak isnan mennam-ayan nan ipogawmo ya ta makigasingak ken daida isnan mang-idayawanda ken sik-a.

⁶ Ninbasol kami ay kaneg din alal-apomi. Nin-ikkan kami is ngawi ya makedse kami.

⁷ Isdin nintean din alal-apomi id Egipto et egayda paayen din kaskasdaaw ay inik-ikkan nan apo. Kinalingkinganda din namin-ado ay nang-ipail-ilaana isnan layadna ya dinokoganda siya ay manakabalin isnan Gadangdang ay baybay.

⁸ Ngem insalakana kayet daida ay kaneg din inkalina ta ipailana nan pilmi ay kabaelana.

⁹ Binilina nan Gadangdang ay baybay et namagaan ya inpagedangna nan ipogawna isnan namagaan ay lota.

¹⁰ Insalakana daida isnan mangliliget ken daida. Owen, insalakana daida isnan kabaelan nan mangbosboso ken daida.

¹¹ Linimon nan danom nan mangbosboso ken daida et maid olay esa is nabay-an.

¹² Dat patiyen nan ipogawna nan inkalkalina dadapay idayday-eng nan pangdayawda ken siya.

¹³ Ngem adi mabayag et kalingkinganda din inik-ikkana. Ik-ikkanda pay nan laydenda ay egayda on-ona ninsoot ken siya.

¹⁴ Pilmi pay nan bigawda isdin kawad-anda isnan pondag ya padpadasenda si Apo Dios.

¹⁵ Et inidyana nan dinawatda ngem inpaeyna gedan nan kaeegyat ay sakit ken daida.

¹⁶ Isdi isnan pondag et nin-imon nan tap-in di Israelita ken Moses ya ken Aaron nan nadiosan ay baan nan apo.

¹⁷ Dat mang-ak nan lota et maekdag da Datan danapay gab-onan si Abiram ya nan pamilyana tay daida nan mang-ap-apos ken da Moses ken Aaron.

¹⁸ Ginomwab pay nan apoy isnan iib-ada et poowana nan makedse ay ipogaw.

¹⁹ lsdin kawad-anda id Horeb et sinmapoda isnan balitok is kaneg baka dadat daydayawen san deey baka ay sinangdidiosda.

²⁰ Insokatda nan dayaw nan apo isnan tinagtagon di baka ay mangan is logam.

²¹ Kinalingkinganda nan Dios ay nang-isalakan ken daida isnan kaskasdaaw ay inik-ikkana id Egipto.

²² Pilmi nan kaskasdaaw ay inik-ikkana isdi ya nan kaskasdaaw ay inikkana isnan Gadangdang ay baybay.

²³ Isonga kinwanin Apo Dios en dosaena nan ipogawna ngem si Moses ay pinilina ay baana et intakdegana daida ken Apo Dios tapno adi itoloy Apo Dios nan ligetna ay mangdosa ken daida.

²⁴ Iniyawda pay kitdin san gawigawis ay daga tay egayda pinati nan inkalin Apo Dios ken daida.

²⁵ Ninlilida pay et egayda inidnge nan apo

²⁶ isonga insapatana ken daida en ipapateyna daida isnan pondag

²⁷ ya awnitna iwakat nan aap-oda isnan kailiili ta menteeda isnan natkenatken ay il-ili.

²⁸ Dat id Peor et nakidaydayaw nan ipogaw Apo Dios isnan sinangdidios ay Baal dadapay inisda nan naidaton issan sinangdidios ay maid biyagna.

²⁹ Pinaligetda nan apo isnan ik-ikkanda et masakitda is kaeegyat.

³⁰ Ngem dat makibiyang si Finees et dosaena nan nakabasol daet somaldeng nan sakit.

³¹ Et siya nan gapo ay isnan pang-iilaan nan apo et nalinteg siya ya adi kalkalingkingan nan aap-on di ipogaw is kasin enggana is komasin nan kinalintegna.

³² Pinaliget gedan nan ipogaw nan apo id Meriba et nakaan nan anos Moses ken daida.

³³ Gapo tay pinaligatda si Moses danat kanan san kinwanina ay egayna ninemnem on-ona.

³⁴ Egayda pay tinongpal nan inbilin nan apo ay pateyenda nan kaipoipogaw isnan liliwesenda

³⁵ nodi nakiasawada is ken daida dadapay toladen nan ik-ikkanda.

³⁶ Nindaydayaw gedan nan ipogaw Apo Dios isnan sinangdidios et siya nan nailaw-ananda ay ninbasol.

³⁷ Inboyagda nan mismo ay an-akda isnan aanito.

³⁸ Pinateyda nan maid basolna ay oongong-a ta idatonda isnan sinangdidios id Canaan. Et nalogitan nan ili isnan ninpatpateyanda.

³⁹ Pinabalinda nan aw-awakda ay nalogit gapo isnan ik-ikkanda ya dinokoganda si Apo Dios.

⁴⁰ Isonga nakaliget nan apo isnan ipogawna et namaid nan ganasna ken daida.

⁴¹ Binaybay-ana daida isnan kabaelan di kailiili tapno mentolay nan mang-aamis ken daida.

⁴² Aamisen nan mangbosboso daida et inikkanda nan kaykaytenda isnan Israelita.

⁴³ Namin-ado ay insalsalakan nan apo nan ipogawna ngem kaykaytenda kayet ay mensoksokil dadat komapsot isnan kinangawida.

⁴⁴ Ngem olay no keg todi et inkaskasona kayet daida isnan mapalpaligatanda isnan nangdengngana isnan dawatda.

⁴⁵ Gapo ken daida et egayna kinalkalingkingan din nakitolagana danat sineg-angan daida gapo isnan adi menbalbaliw ay layadna ken daida.

⁴⁶ Pinaseg-angan nan apo daida isnan nang-ibalod ken daida.

⁴⁷ Isalakanmo dakami apo ay Diosmi dakat dagopen dakami isnan kailiili ta men-iyaman kami ken sik-a ya menlagsak kami isnan mang-idaydayawanmi ken sik-a.

⁴⁸ Madayaw nan apo ay Dios di Israelita. Owen, madayaw siya ay eng-enggana. Sapay koma ta aboloyan nan kaipoipogaw. Madayaw nan apo.