Salmo 105 - Kalin Apo Dios

¹ Men-iyaman kayo isnan apo dayopay ipagtek nan kinapategna. Ibagayo isnan kaipoipogaw nan inik-ikkana.

² Menday-eng kayo ay mangdayaw isnan apo ay mang-ibaga isnan kaskasdaaw ay inik-ikkana.

³ Idayawyo nan apo ay maid polos kangawina ya menlagsak koma am-in ay mangdayaw ken siya.

⁴ Somag-en kayo isnan apo tay wada nan kabaelana ya siya koma nan menpatakdowanyo.

⁵ Nemnemenyo pod nan kaskasdaaw ay inik-ikkana ya nan panagbanagna,

⁶ dakayo ay aap-on din si Abraham ay baana ay aan-ak gedan din si Jacob ay pinilina.

⁷ Nan apo nan Dios tako et nan bilbilina et pala isnan am-in isnan batawa.

⁸ Adina kalkalingkingan nan nakitolagana. Nan inkalina isnan kaipoipogaw et mentoltoloy ay maid patenggana.

⁹ Adina kalkalingkingan san nakitolagana ken Abraham ay kasina inkali ken Isaac.

¹⁰ Pinakneg nan apo san katolagan ken Jacob. Owen, pinaknegna ken Israel et siya nan tolag ay eng-enggana.

¹¹ Tay kinwanina en, “Awnitko idya nan daga ay Canaan ken dakayo ta siya nan tawidyo.”

¹² Idi atik pay laeng nan ipogaw Apo Dios ay kanegda sangaili isnan menteteanda

¹³ et nin-atoatonda isnan natkenatken ay il-ili.

¹⁴ Ngem nan apo et egayna ipalobos ay waday mangpalpaligat ken daida. Binagbagaana nan aali tapno masalaknibana nan ipogawna

¹⁵ isnan nangwaniyana en, “Adiyo soksokilen nan pinilik ya adiyo paligaten nan mamadtok.”

¹⁶ Issan nang-ipaeyan nan apo is bitil isnan il-ilida danapay pinammid am-in ay kanenda

¹⁷ et epdasna inpaon-ona nan esay ipogaw ken daida. Siya si Jose ay nailako et menbalin ay baa.

¹⁸ Naibalod et nakawalan nan sikina ya inpakayabangda nan landok isnan tengedna

¹⁹ enggana ay tinmet-ewa din inpadtona. Nan inpagtek nan apo ay inpadton Jose nan nangpaneknek ay siya et nalinteg.

²⁰ Dat ipabalan nan alin di Egipto siya. Owen, winayaan nan ali siya.

²¹ Dinotokana si Jose ay mangitakdeg ken siya ya mang-ayowan isnan itoltolayan nan ali.

²² Siya gedan nan mang-itdo isnan mang-ipangpango ya mang-isolo isnan aamam-a ta somilibda.

²³ Daet omey abes da Israel id Egipto et makiteeda isnan deey ay ili.

²⁴ Pinaadon nan apo nan ipogawna danat pinapigpigsa daida mo nan mang-ap-apos ken daida.

²⁵ Inpalobosna ay ligten nan iyEgipto nan ipogawna dadapay sikapan daida.

²⁶ Danat ipaey nan baana ay si Moses ya nan pinilina ay si Aaron.

²⁷ Inikkanda nan kaskasdaaw ay inpaik-ikkan nan apo ay inikkanda id Egipto.

²⁸ Inpaey nan apo nan bolinget isnan ili ngem egay kayet pinatin nan iyEgipto nan bilina.

²⁹ Pinabalina nan danom is basa isnan kaginaginawang danapay pinatey am-in nan ikan is dadi.

³⁰ Pinona pay nan ilida is tokak ay olay nan baey di ali et wadada gedan.

³¹ Daet ninbilin nan apo et mapno nan deey ili is ngilaw ya tilang.

³² Inpaeyna pay nan dalalo ya nan kaeegyat ay kimat isnan il-ilida

³³ danapay sepaken nan kak-aiwda ya dadaelen nan tap-in di molmola.

³⁴ Binilina pay nan adoado ay dodon ay adi kabilang

³⁵ et omeyda kanen am-in nan molmola isnan ili ay Egipto ya kinanda am-in ay nais-ek.

³⁶ Inpapateyna pay nan iyon-a ay lalaki ay an-ak di iyEgipto.

³⁷ Danat ibala nan Israelita et inkakawitda nan palata ya balitok di iyEgipto. Isnan kinmaananda et gawis ya napigsada am-in.

³⁸ Omegyat nan iyEgipto ken daida isonga men-gasingda issan kinmaanan nan Israelita.

³⁹ Inmippey nan apo is liboo isnan kag-aw ay mangipangpango ken daida ay ipogawna ya apoy isnan labi ta mangsilaw ken daida.

⁴⁰ Nindawatda et inpaeyna nan kasabasabag ya inagtana daida is makan ay nagapo id daya ta mapnekda.

⁴¹ Inpabalana nan danom isnan bato et men-ayos isnan pondag ay kaneg ginawang

⁴² tay egayna kalingkingan din napateg ay inkalina ken Abraham ay baana.

⁴³ Inpangpangon nan apo nan ipogawna ay pinilina dadapay mendayday-eng gapo is gasingda.

⁴⁴ Inidyana ken daida nan dagan di tap-in di ipogaw ya inpalobosna ay kowaenda nan ninling-etan di ipogaw isdi

⁴⁵ tapno tongpalen nan ipogawna nan lintegna ya ta adida kalingkingan nan bilbilina. Madayaw nan apo.