Salmo 104 - Kalin Apo Dios

¹ Daydayawek nan apo isnan am-in ay nemnemko. apo ay Diosko, sik-a nan manakabalin. Sik-a gedan nan kangatowan ya kapatgan.

² Menpalalat-a nan kad-am ya sik-a gedan nan nangbilag isnan anaannawa ay daya.

³ Sinaadmo pay gedan nan menteteam isnan ngangatowen di dandanom id daya. Isnan omayam et nan liboo nan menloganam dat itayaw nan dagem nan menlologanam.

⁴ Nan dagem nan kanegmo ibab-aa ya olay nan kimat gedan.

⁵ Makneg nan inpegnadmo isnan batawa ta adi polos mawedwed.

⁶ Pinosongmo nan batawa et adi kaila nan bilbilig.

⁷ Ngem isdin nangbilinam isnan danom et kinmaan. Owen, idi dinngen nan danom nan bilinmo dat dagos ay omey isnan ostoy teana.

⁸ Nin-ayos isnan bilbilig et mallos isnan nadidiyok enggana isnan sinapom ay teana.

⁹ Pinay-am is beddengna ta adi mabalin ay lasaten nan danom ta adi kasin malayos nan batawa.

¹⁰ Pinaayosmo nan balaan isnan nadidiyok et nin-ayos nan danom isnan gagawaen nan bilbilig.

¹¹ Siya dana nan omin-inoman nan atap ay animal. Owen, siya nan ominoman di atap ay animal no maewewda.

¹² Bomaey nan koykoyat isnan kak-aiw isnan bengbenget di ginawang dadat menkankanta isnan sangsangana.

¹³ Ipaalim nan odan isnan bilbilig et mapnek nan batawa is bindisyonmo.

¹⁴ Patobowem nan logam ay pala isnan talaken ya nan mola pala isnan ipogaw ta wada nan kanenda.

¹⁵ Somapoda is basi ay mangpalagsak ken daida ya lana is mangpabgew ken daida ya makan ay mangpapigsa ken daida.

¹⁶ Omanay nan odan ay mangsibog isnan kak-aiw ay inpas-ek nan apo ay nan makneg ay kak-aiw di Lihano

¹⁷ ay menbaeyan di koykoyat. Nan tap-in pay abes di koyat et menteeda isnan batang.

¹⁸ Nan abes anatakdag ay bilbilig et siya nan mentean di atap ay kalding. Ya nan batbatowan nan tean abes nan tap-in di atap.

¹⁹ Sinapom nan bowan ay mang-ipagtek isnan mensokatan di timpo ya getken gedan nan agew nan olas ay lomnekana.

²⁰ Sinapom nan labi ay menbolinget et siya nan bomalaan di atap ay animal.

²¹ Menngiyed nan an-ak di layon isnan men-anapanda is kanenda ay magapo ken Apo Dios.

²² Bomala pay nan agew dadat somagong isnan teanda

²³ dapay abes bomala nan ipogaw ay men-obla enggana ay masmasdem.

²⁴ Apo, adi kabilang nan binoliwmo. Binoliwmo am-in daida isnan silibmo et mapno nan batawa isnan binoliwmo.

²⁵ Wada pay nan baybay ay dakkel ya anaannawa ay mentetean di adi kabilang ay dadakke ya baban-eg ay binoliwmo.

²⁶ Mendaan isnan naay baybay nan bapbapol ya men-ay-ayam gedan isnan baybay nan dakkel ay binoliwmo ay bowaya ay makwani en Leviatan.

²⁷ Am-in ay binoliwmo et sik-a nan menkamanganda ta idyam nan kanenda isnan mangsapolanda.

²⁸ Idyam ken daida et kanenda. Owen, idyam nan makan ta mapnekda.

²⁹ No baybay-am daida et madanaganda. No kaanem nan angesda et mateyda et somagongda isnan lota ay nagapowanda.

³⁰ Dakat ibaa kasin nan lspiritom ay mangboliw isnan tap-ina ta wawawawada nan mentetee isnan batawa.

³¹ Sapay koma ta maid patenggan nan dayaw nan apo. Sapay koma ta men-gasing nan apo isnan binoliwna.

³² Menyegyeg nan batawa isnan mang-ilaan nan apo ya no sikgadena nan bilbilig et omasokda.

³³ Mendaydayawak isnan apo enggana ay matatagowak. Enggana ay matatagowak et idayday-engko nan pangdaydayaw isnan Diosko.

³⁴ Sapay koma ta magasingan isnan kankanak tay magapo ken siya nan gasingko.

³⁵ Madosa koma nan managbasol isnan batawa ya mamaid et koma nan mang-ik-ikkan is ngawi. Daydayawek sik-a apo. Madayaw nan apo.