Salmo 103 - Kalin Apo Dios

¹ Daydayawek nan apo. Owen, isnan am-in ay kabaelak et daydayawek nan apo ay maid polos kangawina.

² Daydayawek nan apo isnan am-in ay nemnemko. Adiyak kalkalingkingan am-in nan gawis ay ik-ikkana.

³ Pakawanena am-in ay basolko ya pagawisena am-in ay sakitko.

⁴ Sobtena sak-en isnan adaadaem ay lengaw ya bindisyonana sak-en is layad ya seg-ang.

⁵ Penekena sak-en is ado ay kinagawis tapno olay maam-amaak et napigsaak kayet ay kaneg isdin kaong-ongak.

⁶ Nan apo et nalinteg ya ostoosto nan ik-ikkana isnan maaamis.

⁷ Inpagtekna isdin si Moses nan panggepna ya inpailana isnan Israelita nan kaskasdaaw ay inik-ikkana.

⁸ Managlayad ya managseg-ang nan apo ya naanos ya adi menbalbaliw nan layadna.

⁹ Adina motmotmotan et datako ya adi et makalkaliget ken datako.

¹⁰ Nalaklaka nan idosana ken datako ay baken nan maibagay isnan basol tako ya baken gedan nan baes ay maibagay isnan kinangawi tako nan ikkana.

¹¹ Tay kaneg nan kaat-atakdag nan daya isnan lota nan kadakdak-en nan adi menbalbaliw ay layadna isnan mangpatpateg ken siya.

¹² Kaneg nan kaad-addawin nan balaan di agew isnan lomnekana nan kaneg nan mang-iyaddawiyana ken datako isnan basbasol tako.

¹³ Kaneg nan mangsegseg-angan di ama isnan an-akna nan mangseg-angan nan apo isnan mangpatpateg ken siya

¹⁴ tay getkena nan menkapsotan tako ya gegetkena ay lota nan nagapowan tako.

¹⁵ Nan biyag di ipogaw et kaneg logam. Siawyan et kedeng ay kaneg nan mensabongan di bayaya

¹⁶ ngem no mendagem dat mamaid et adiyet kail-ila.

¹⁷ Ngem nan adi menbalbaliw ay layad nan apo et mawawawada isnan mangpatpateg ken siya ya nan kinalintegna et mentoltoloy isnan aap-oda ay eng-enggana.

¹⁸ Owen, ken daida ay mangtongpal isnan nakitolagan Apo Dios ken daida ya adi mangkalkalingking isnan bilbilina.

¹⁹ Inpakneg nan apo nan mentolayana id daya et mentolay isnan am-in.

²⁰ Daydayawenyo nan apo, dakayo ay aanghelna, dakayo ay napigsa ay mang-ikkan isnan bilina ya mang-idnge isnan kankanana.

²¹ Owen, daydayawenyo nan apo, dakayo am-in id daya ay baana ay mangtongpal isnan bilina.

²² Madaydayaw nan apo isnan am-in ay binoliwna ay itoltolayana. Daydayawek nan apo isnan nemnemko.