Salmo 102 - Kalin Apo Dios

¹ apo, dengngem kad nan lowalok ya dengngem koma nan dawatko.

² Adim baybay-an sak-en isnan mapaligatak. Dengngem sak-en dakat mangbadang ay dagos isnan mendawatak.

³ Tay nan biyagko et kaneg asok nan mamaidana. Menpololoos nan awakko ay kaneg apoy.

⁴ Nakapsotak ay kaneg nan nalaylay ay esek dakpay kalingkingan et pay ay mangan.

⁵ Gapo isnan menligligatak et naipket et nan kodil isnan tolangko.

⁶ Makekedengak ay kaneg nan koyat ay naipopokok. Owen, kaneg nan koop ay maeesa isnan teana.

⁷ Adiyak makaseyep. Kanegak nan menseseg-ang ay koyat isnan naipokokana.

⁸ Omag-agew ay baibainan nan mang-ap-apos sak-en. Nan mangsasayot ken sak-en et no menbaosda et kananda en, “Komanegka koma ken todi.”

⁹ Menseseg-angak isonga mentamnay ay kaneg dapo nan kankanek ya nan in-inomek et natedtedan isnan agak.

¹⁰ Gapo isnan ligetmo et nangdosaka dakat baybay-an sak-en.

¹¹ Nan biyagko et kaneg nan alin-ew isnan sedem. Kanegak lomokelokey.

¹² Ngem sik-a apo et wadaka ay eng-enggana. Adi kalkalingkingan nan ap-on di ipogaw is kasin enggana is komasin sik-a.

¹³ Awnitmo kasin seg-angan daida id Sion. Inomdan et nan timpo ay mapateg siya. Owen, id wani nan omno ay timpo.

¹⁴ Tay laylayden nan babaam nan ili ay Sion ay olay no nadadael ya wada nan seg-angda issan ili ay olay no nabaybay-an.

¹⁵ Awnit ipateg nan kailiili nan apo ya patgen gedan nan am-in ay ali isnan batawa nan kinangatona.

¹⁶ Tay kasin ipas-et nan apo nan Sion et awnitna ipaila nan kinangatona.

¹⁷ Awnitna idnge nan nabaybay-an ay ipogawna et dengngena nan lowaloda.

¹⁸ Maisolat na pala isnan maisned ay aan-ak ta daydayawen nan ipogaw ay daan maiyanak.

¹⁹ Nin-osdong nan apo id daya ay kad-ana. Owen, inosdongana nan batawa

²⁰ ta dengngena nan mensegseg-angan nan balod ya ta wayaana nan epdas nakedngan ay matey.

²¹ Ipagpagtek nan kaipoipogaw nan ik-ikkan nan apo id Sion dadapay daydayawen siya id Jerusalem

²² isnan madagdagopan am-in nan kaipoipogaw ay mensilbi isnan apo.

²³ Nangpakapsot nan apo isdin pay laeng mensiksiknak ta makeskesayan nan matatagowak

²⁴ ngem ninlowalowak en, “Diosko, sik-a ay wawawawada isnan katew-etew-en et adim kad ap-apiten sak-en tay egayak pay laeng kaeteng.”

²⁵ Isdin on-onana et sik-a nan nangboliw isnan batawa ya sik-a gedan nan nangboliw isnan daya.

²⁶ Awnitda mamaid ngem sik-a et wawawawadaka. Daida et kanegda bado ay lomogak tay awnitda masokatan ay kaneg nan nalogak ay bado ay adi et maosal

²⁷ Ngem sik-a et sisisiyangna ya nan biyagmo et maid patenggana.

²⁸ Awnit maid iyeg-egyat nan an-ak di baam ya mentoltoloy nan badangmo isnan aap-oda is kasin.