Salmo 101 - Kalin Apo Dios

¹ Iday-engko nan maipanggep di kinalinteg ya kinaosto ken sik-a apo.

² Makailak ta gawis am-in ay ik-ikkak ta maid kadelawak. Tongona pay nan omaliyam ken sak-en? Osto ya gawis nan ik-ikkak isnan baeyko.

³ Adiyak ipalobos ay waday ngawi is maik-ikkan. Adyak nan ngawi ay ik-ikkan di mangdokog ken sik-a, Apo ya adiyak polos sagsag-enen nan ngawi.

⁴ Adiyak men-al-allilaw ya adiyak makiik-ikkan isnan ngawi.

⁵ Awnitak dosaen nan mangisipsipsip isnan sagogongna. Adiyak maanosan nan lastog ya men-et-etek.

⁶ Ikaskasok nan mamati ken Apo Dios et awnitda makikadwa ken sak-en. Daida ay nadalos nan nemnemda isnan matatagowanda et awnitda makisilbi ken sak-en.

⁷ Nan men-al-allilaw et adi mabalin ay mentee isnan baeyko ya nan kampotan et adi mabayag ken sak-en.

⁸ Inagew ay dosaek am-in ay makedse isnan sakop di itoltolayak enggana ay mamaid nan am-in ay managdakdakes isnan ilin nan apo.