Salmo 10 - Kalin Apo Dios

¹ Ayta aya, apo, dakan od omaaddawi? Dakan mentabon isnan maliligatanmi?

² Isnan menpatpatek-agan nan makedse et paligatenda nan kodokdo. Sapay koma ta daida nan madpap isnan ngawi ay gandatna.

³ Nan managbasol et it-it-ekna nan ngawi ay panggepna ya ab-aboloyana nan agom danapay adiyan nan apo.

⁴ Adina ikaskaso nan apo isonga isnan kinangaton di nemnemna et kankanana en, “Adiyak masapol nan Dios.”

⁵ Matongpal nan am-in ay ik-ikkana isonga isnan kinangaton di nemnemna et kankanana en maid silbin nan linteg Apo Dios ken siya danapay iyawen nan mang-apos ken siya.

⁶ Kanana isnan nemnemna, “Adiyak maab-abak ya maid polos ngawi is om-ommat ken sak-en.”

⁷ Menbab-aos, menkamkampot ya pangeg-egyat nan ik-ikkana. Mensakit nan panagkalkalina.

⁸ Mentatabon isnan maid polos ipogaw ay mangseseed isnan maid basolda ta pateyena. Sisiimena nan maid kabaelanda.

⁹ Menseseed ay kaneg layon isnan mentatabonana ta mendakmaana daida. Owen, menseseed is kodo is silowana danat golaloden ay mangiyey isnan ad-addawi.

¹⁰ Maabak nan maid kabaelana ay dinpapna. Naabak isnan pilmi ay pigsana.

¹¹ Danat kanan isnan nemnemna en, “Kinalingkingan Apo Dios daida. Lilingbana od nan angasna isonga adina maila nan om-ommat.”

¹² apo, dosaem et daida ay managbasol. Adim pod kalingkingan nan maligligatan.

¹³ Ayta dan adiyan nan makedse si Apo Dios? danapay kanan isnan nemnemna, “Adi dosaen Apo Dios sak-en.”

¹⁴ Ngem sik-a, apo, et iilaem kadi nan madadanagan ya getkem nan maliligatan dakapay nakasagana ay mangbadang ken daida. Nan makasapol et sik-a nan kamkamangenda tay sik-a nan mangbadbadang isnan ngoso.

¹⁵ Pasaldengem koma nan kabaelan di makedse ya managbasol ya dosaem daida isnan ngawi ay ik-ikkanda engganay somaldeng nan kinangawida.

¹⁶ Nan apo et Ali ay eng-enggana. Nan mendaydayaw isnan sinangdidios et awnitda mamaid isnan dagana.

¹⁷ apo, sik-a nan mang-inaag isnan lowalon di napaligatan dakapay papigsaen nan nemnemda tay dengngem nan adawagda.

¹⁸ Salaknibam nan kalintegan di maaamis ya nan ngoso tapno somaldeng nan ipogaw isnan pangeg-egyatda.