Ruth 1 - Kalin Apo Dios

¹ Isdin timpo ay nan aamam-a ay pinilin nan apo din mangbanbanag isnan Israelita et wada nan bitil isnan ilida. Isonga inmey mentee id Moab nan esay am-ama ay iBetlehem isnan probinsya ay Juda ay nanakkey da asawana ya nan dowa ay an-akna ay lalalaki.

² Nan deey am-ama et Elimelec nan ngadana, si asawana et Noemi dat nan dowa ay an-akna et Mahalon ya Kilion nan ngadanda. Id Efrata isnan ili ay Betlehem nan nagapowanda. Isdin kawad-anda id Moab

³ dat matey si Elimelec et mataynan si Noemi ay asawana ya nan dowa ay lalalaki ay an-akna.

⁴ Dat makiasawa datona is iMoab. Nan esa et Orfa nan ngadana ya nan esa et Ruth. Ninteeda isdi is simpoo ay tew-en

⁵ dat abes matey da Mahalon ken Kilion. Nabalo si Noemi ya maid et nan doway lalalaki ay an-akna.

⁶ Issan kawad-anda pay laeng id Moab et dinngen Noemi ay binadangan nan apo nan ipogawna ay Israelita et gawis kasin nan apitda isonga dat mensagana siya ya san inapona ay bababai ta somagongda isnan ilina.

⁷ Dat menlobwat da Noemi ya nan inapona et komaanda isnan ili ay menteteanda ta omeyda isnan probinsya ay Juda.

⁸ Ngem issan mendad-aananda dat kanan Noemi issan dowa ay inapona en, “Somagong kayo isnan wasdin baey di in-ayo. Sapay koma ta badbadangan nan apo dakayo ay kaneg nan inkakanyo isdin natey ay as-awayo ya ken sak-en.

⁹ Sapay koma ta ipalobos nan apo ay makiasawa kayo kasin dakayot maganak isnan as-awayo.” Dat menpakada si Noemi isnan inapona ay mangtayan koma ken daida. Ngem nin-agada

¹⁰ dadapay kanan ken siya en, “Adi kami. Makkey kami ken sik-a isnan omayam ay kakailyam.”

¹¹ Ngem dat kanan Noemi en, “Adi, masapol ay somagong kayo. Ayta dakayon aped makmakkey ken sak-en? Aykeak kasin omanak is tap-in di lalalaki ta asawaenyo kasin?

¹² Somagong kayo kitdin tay nain-inaak et is kasin makiasawa. Olay no wada kayet di namnamak ay makiasawa id wani ay labi daket omanak is lalalaki

¹³ ayke kayo gedan nakasagana ay menseseed engganay masikenda? Ay adi kayo makias-asawa kasin engganay masikenda? Menseseg-angak pala ken dakayo ay inapok tay binaybay-an nan apo sak-en.”

¹⁴ Dat kasin men-aga nan iinapona. Dat menpakada si Orfa ken katogangana et somagong isnan kad-an di iib-ada ngem si Ruth et inpapatina kayet ay makkey ken katogangana.

¹⁵ Dat kanan Noemi ken siya en, “Ilaem pod et sinmagong et isnan iib-ana ya isnan diosna nan abilatmo isonga gag-awis no somagongka abes.”

¹⁶ Ngem dat kanan Ruth en, “Adim ipapati ay taynak sik-a. Ipalobosmo ay makkeyak. Olay intoy omayam makkeyak ya olay intoy menteam et makiteeak. Nan kakailyam et awnit kakailyak abes ya nan Diosmo et Diosko gedan.

¹⁷ Et olay intoy mateyam siya nan mateyak ya isdi nan maikaobak. Dosaen koma nan apo sak-en no ipalobosko ay waday mangsiyan ken daita malaksig nan tetey.”

¹⁸ Idi gintek et Noemi ay kayten tet-ewa Ruth ay makkey ken siya danat igiginek

^19a et itoloyda et ay dowa ay omey id Betlehem.