Oseas 6 - Kalin Apo Dios

¹ Dat kanan nan kaipoipogaw en, “Somagong tako isnan apo. Pinaligatna datako ngem sigolado ay awnitna agasan datako. Sinogatana datako ngem awnitna bedbedan nan sogat tako.

² Isnan dowa wenno tolo ay agew et awnitna tagowen datako et awnit tako matatatatago isnan kad-ana.

³ Getken tako ay siya nan tet-ewa ay apo isonga ipapati tako ay manggetek pay kayet ken siya. Nan katet-ewan nan awnitna omaliyan ken datako et kaneg nan sigolado ay domatngan nan tan-o ya nan tet-ewa ay domatngan di odan.”

⁴ Ngem dat kanan nan apo en, “Ngan pay di ikkak ken dakayo Israel ya Juda? Nan layadyo ken sak-en et dagos ay mammid ay kaneg nan liboo isnan wakgawakgat ay mammid ay dagos ya kaneg nan monglo ay masapa ay mamaid esapay makag-aw.

⁵ Isonga inpaeyko nan mamadtok ay mang-ibaga isnan ikkak ay men-okom ya mendadael.

⁶ Nan laydek et nan mentoltoloy ay layadyo ken sak-en ay baken nan palpaltiyenyo ay animal ay idatdatonyo. Mas laylaydek ay getken nan ipogawko sak-en mo nan menpop-oowanda is idatdatonda ken sak-en.”